Perorsaasut nutaatut atugassat Nuummi meeqqerivinni ulluinnarni meeqqanut sulisunullu pitsanngorsaataassapput.
Nuummi meeqqeriviit perorsaasutut sulisunik amerlanernik sulisoqalissaaq. Tassami aaqqiissut nutaaq “Perorsaasut inimut aalajangersimasumut pituttorsimanngitsut” taaneqartoq eqqunneqassasoq kommunalbestyrelsimit aalajangiunneqarpoq. Perorsaasoq inimut aalajangersimasumut pituttorsimanngitsoq perorsaasuuvoq misilittagalik sap. ak. akunnerit 30-t sulisartoq. Perorsaasoq sulisut amerlassusiligaanerannut ilaatinneqanngilaq perorsaanermullu tunngasuinnarnik suliaqassalluni.
Aaqqiissut Nuummi meeqqerivinni marlunni ukioq misileraatitut ingerlanneqarpoq, taakkuunanilu angusat pitsaangaarmata aaqqiissutip siammarterneqarnissaa ingerlatsivimmit aalajangiunneqarpoq.
”Sulisut akornanni apersuilluta misissuivugut misissuinittalu takutippaa, perorsaasut inimut aalajangersimasumut pituttorsimanngitsut atuunnerisa nalaanni sulerusussuseqarneq annertusisimasoq. Sulisut sulinerminni piffissaqarnerulertutut nukissaqarnerulertutullu misigisimapput”, taama oqarpoq Meeqqanut Atuarfeqarnermullu Ataatsimiititaliami siulittaasoq, Juaaka Lyberth.
Perorsaasut inimut aalajangersimasumut pituttorsimanngitsunik aaqqiissutip atuunnerani napparsimasarnerit ikileriassasut ingerlatsivimmiit naatsorsuutigineqarsimavoq, Coronalli allanngortup Omikronip Nuummi misileraaffiuleruttorfiup nalaani atuutilermat napparsimasut amerlasimaqaat.
”Perorsaasutut inimut aalajangersimasumut pituttorsimanngitsutut atorfik nutaajuvoq allaanerullunilu. Ullup ilaannaa atorlugu suliffiuvoq allaffissornikkullu tunngasunik suliaqarfiunani. Neriuppugut atorfik perorsaasunut ullumikkut suliffeqanngitsunut pilerinarsaataajumaartoq. Tamatuma peqataanik meeqqerivinni immikkut perorsaasoqalerneratigut suliffeqarfiit sulisunut allanut pilerinarsaataajumaartut”, Juaaka Lyberth, taama oqarpoq.
Perorsaasut inimut aalajangersimasumut pituttorsimanngitsut pillugit aaqqiissut kommunimi meeqqerivinni tamani 26-ni eqqunneqassasoq naatsorsuutaavoq, tamannalu borgmesterimit, Avaaraq S. Olsenimit nuannaarutigineqarpoq.
”Meerartatta pitsaasumik ineriartuutaasumillu immersorneqarfiulluartumik meeqqerivimmiittarnissaat pingaaruteqaqaaq. Perorsaasut inimut aalajangersimasumut pituttorsimanngitsut pillugit aaqqiissut ilorraap tungaanut sangutitsisinnaavoq. Meeqqerivinni atorfiit tamaasa sulisussaqartinniarneri ajornakusoortoq isertuussassaanngilaq. Taamaammat suliffeqarfiit pineqartut pilerinarsarniarlugit nutaamik eqqarsartariaqarpugut”, Avaaraq S. Olsen oqarpoq.
Perorsaasut inimut aalajangersimasumut pituttorsimanngitsut pillugit aaqqiissummut aningaasat 2023-mut missingersuutinut immikkoortinneqassapput. Aaqqiissutip 6 mio. kr.-inik naleqarnissaa naatsorsuutigineqarpoq.