Services

Nunaqarfinni ilinniartitsisussarsiorneq iluatsilluarpoq

Nuannaarutaasumik Kommuneqarfik Sermersuumi nunaqarfiit tamakkerlutik minnerpaamik ataatsimik ilinniartitsisutut ilinniarsimasumik atorfinitsitaqalerput. Tamanna Meeqqanut Atuarfeqarnermullu ingerlatsiviup anguniagaasa anguniarnerinut alloriarneruvoq.

Meeqqanut Atuarfeqarnermullu ingerlatsiviup anguniagaasa ilagaat meeqqat atuarfianni atuartut naammassigaangamik amerlanerpaartaasa ilinniagaqaqqittarnissaat. Tamassumalu angujartuaarneqarnerani ilinniartitsisutut ilinniarsimasut atorfineqqammersut annertuumik alloriartitsissapput.

”Ukioq manna ilinniartitsisussarsiorluarnitsigut ilinniartitsisutut ilinniarsimasunik atorfinitsitsivugut, nunaqarfiillu tamarmik minnerpaamik ataatsimik ilinniartitsisoqalerlutik. Tamanna alloriaataavoq pitsaasoq. Qeqertarsuatsiaanilu pingasunik aamma ilinniartitsisut ilallutik. Nukiillu amigaatigisavut ilorraap tungaanut maanna saapput, neriuppugut suli aamma nunaqarfinnut suliartorusuttut amerlisinnaassasut”, atuarfeqarnermut immikkoortortaqarfimmi fagchefi Riikki Grønvold taama oqarpoq.

Nunaqarfimmi ilinniartitsisunik ilinniarsimasunik atorfinitsitsiniartarneq siornatigut ajornaatsuuneq ajorpoq, ilinniartitsisullu nunaqarfimmut nuussimasup oqaatigaa atuartut atuagarsornikkut unammillernartitaqarnerusartut.

”Tasiilami ilinniartitsisuunerma nalaani atuartut nunaqarfimmiit Tasiilamut atuariartoraangata malugisinnaasarpara atuagarsorneq unammillernartinnerusaraat, assersuutigalugua immikkut sammisaqarnermi. Maanna Kuummiunut nuuppunga, nunaqarfinni atuartut atugaannut siuarsaaqataarusullunga”, taamak oqarpoq Alice Pivat Kuummiunut ilinniartitsisunngoriartorsimasoq.

Kommuneqarfik Sermersuup Atuarfeqarnermut politikkia uani atuarsinnaavat