Kommuneqarfik Sermersuumi pisortaqatigiit ulluni marlunni Paamiunut tikeraarput, tikeraarnermilu illoqarfimmi kommunip sulisui tamaasa naapinnissaannut, ingerlatsivinni assigiinngitsuni ataatsimiinnissanut aammalu illoqarfimmi suliffeqarfinnut assigiinngitsunut piffisaliisoqarsimalluni.
Pisortaqatigiit sisamanngornermi septembarip ulluisa 15-ianni tikipput, kommunimilu sulisut ullaakkorsioqatigiinnissamut qaaqquneqarsimasut toqqaannaq ornillugit ullaakkorsioriartorfigaat. Ullaakkorsioqatigiinneq pereermat kommunaldirektøri Ole Jakobsen Sermersuummi suliniut Kivitsisuuvugut pillugu saqqummiivoq. Suliniut Kivitsisuuvugut kommunimi tamani atortuutilersikkiartuaartinnaqarpoq.
”Suliniut Kivitsisuuvugut pillugu Paamiuni sulisutsinnut kiisami saqqummiussinnaagakku nuannaarutigaara. Qanoq suleriuseqarnitsinnut allannguingaatsisartussaavoq, innuttaasullu kommunimiit sullinneqarnerannut pitsanngorsaataasussaalluni. Taamaammat kommunimi sulisut tamarmik paasissutissinneqarnissaat pingaaruteqarluinnarpoq”, kommunaldirektøri Ole Jakobsen oqarpoq.
Ullup ingerlanerani ataatsimiinnerit aammalu suliffeqarfiit immikkoortortallu assigiinngitsunut pulaarnerinut atorneqarpoq, tassani ilaatigut meeqqerivik Mike aamma illoqarfiup qatserisartoqarfia alakkarneqarlutik.
Pilersaarut imaqarluartoq tallimanngornermi 16-iani nanginneqarpoq, pisortaqatigiit atuarfimmut, sukisaarsartarfimmut, meeraaqqerivik Meeqqamut kiisalu sammisassaqartitsivimmut Nuilaamut pulaarput. Paamiuni Inuussutissarsiornermut siunnersuisooqatigiit aamma ataatsimeeqatigilluarneqarput, ualikkut Nuummut umiatsiamik uternissap pinngilaattaanni.
”Pisortaqatigiiusugut nuannaarutigaarput sulisut Nuup avataaniittut toqqaannartumik kiinnerfigalugit naapissinnaagatsigit. Ulluinnarni ungasissumiit suleqatigisartakkavut naapinnissaat, aamma taakku uagutsinnik naapitsinissaat pingaaruteqarpoq. Naak pilersaarut imaqangaatsiaraluartoq pissarsiaqarluaqaagut, angalanitsinnilu pissarsiarerusutagut anguvagut, neriuutigisatsinniit pissarsiaqarnerunngikkutta”, Ole Jakobsen naggasiivoq.
Kommuni pisortat tamarmik immikkut ingerlatsivinnut pisortatut akisussaaffeqarput. Kommunaldirektøri ingerlatsivimmut ataatsimut akisussaajutigalugu pisortanut allanut pisortatut inissisimavoq.
| Ingerlatsiviit | ||
|---|---|---|
| Suliffeqarfimmi Kiffartuussineq | Kommunaldirektøri | Ole Jakobsen |
| Vicekommunaldirektøri | Marie Fleischer | |
| Meeqqanut atuarfeqarnermullu | Pisortaq | Lone Nukaaraq Møller |
| Meeqqanut ilaqutariinullu | Pisortaq | Martha Abelsen |
| Suliffeqarnermut Isumaginninnermullu | Pisortaq | Ejner Grønvold |
| Sanarfinermut Avatangiisinullu | Pisortaq | Hans Ulrik Skifte |
Assit angalanermeersut ataani takukkit
