Innuttaasunut

Inuusuttut ataqatigiinnermik, illoqarfimminnilu piginneqataanerminnik misigisaqarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sacha Malinsky eqqumiitsuliortutut taaguuteqartoq ”Cheeky” Tasiilami meeqqanut inuusuttunullu Streetartimik workshopertitsivoq, Ammassaliup Katersugaasiviata aaqqissugaanik. Sammisaqartitsineq oqariartuutitilimmik, oqaluttuatoqqaniillu isumassarsiorfeqartumik suliarineqarpoq.

Septemberip allaqqaataaniit tallimaat ilanngullugu Tasiilami Meeqqat inuusuttullu streetartimik sammisaqartinneqarmata oqariartuutitalimmik, oqaluttuatoqqaniillu isumassarsiorfeqartumik Iserit A/S-ip illuutaata toqqaviani eqqumiitsuliamik pilersitsisoqarpoq, meeqqat atuarfianut sammisumi.

Meeqqanut inuusuttunullu sammisaqartitsineq nuannaarnermik isumassarsiornermillu imaqarluarsimavoq, taamaanneranilu ataqatigiinnermik, illoqarfigisamillu piginneqataaneq misigisassaasimapput.

Oqaluttuatoqqat Gaaba Taunajimmit oqaluttuarineqarput:

”Siullermik Qilaat tassaagami siulitta aliikkusersoqatigiinnermikkut, imminnut paasarnermikkut isummakkullu sorsuuttarnermikkut pinngitsoorsinnaanngisaat, qilaat siulitsinnit pingaarutilipilorujussuuvoq. Qupaloraarsuk upernaakkut ilisarnaatit nuannaarutaanerpaasarput siornatigut. Tassa taamani tikikkaangat nuannaartarpugut upernalernera eqqarsaatigalugu”, taamak oqarpoq Gaaba Taunajik, oqaluttuatoqqanik oqaluasaartoq.

”Nalerarpuli”

Qalipakkat saniatigut oqaatsimik nukittuumik ilanngussaqarput tassa ”Nalerarpuli”.

”Tasiilamut pigama suliassarput Tasiilap atuarfianut sammisoq takuara, meeqqat inuusuttullu takusinnaasaani, tassanilu eqqarsarpunga nukittuallannartumik oqariartuuteqassasoq. Tassaalerporlu ”Nalerarpuli” Tasiilami pisorujoorluni qungujunnermik kissalaartumik naammattuuiffiuvoq, inuttaalu ikiuukkumatuujupput ammasuullutillu, assut nersortariaqarlutik”, Sacha Malinsky ”Cheeky” taamak oqarpoq.

Ammassaliup Katersugaasiviata aaqqissugaanik Gaaba Taunaajik aamma Sacha Malinsky isumassarsioqatigiinnissamut naapipput.

“Gaaba Taunaajiup naapinneratigut meeraasimanerminik oqaluttuarfigaanga, Angakkorlu kingulleq Georg Quppersimaat aamma oqaluttuaralugu. Qupaloraarsuk Qilaallu oqaluasaanit soqutiginartunik imaqarput, isumassarsissutigineratigullu eqqarsarpunga Qupaloraarsuup ersersissagaa, eqqissineq inuunerlu, Qilaatillu ersersissagaa isumassarsiorneq sorlaqarfikkullu nukittuujuneq”, taamak Sacha Milinsky ”Cheeky” naggasiivoq.

Meeqqat inuusuttullu qalipaaqataasimasut illoqarfimmut annertoorujussuarmik tunissuteqarput, neriunaqaarlu takullugu illoqarfimmiunut nukittuallaataasarumaartoq.