Nuummi utoqqaat illui ulluni makkunani sulisussaaleqinermik eqqugaaqqapput. Utoqqaat illui sulisussaaleqinermik ajornartorsiuteqareersut, sulisut napparsimanerannik aammalu aasaanerani sulinngiffeqartoqarnerani sulisussaaleqinermit immikkut eqqorneqarpoq.
“Utoqqaat pisariaqartitaat isumagineqarnissaat anguniarlugu sulisut ulapaarnerujussuupput, taamaakkaluartoq najugaqartut pisariaqartitaat tunniussinnaavagut, piffissalli suliffissat inuttalersornissaat unammillernartorujussuarmik inissisimavoq”, utoqqarnik sullissivimmi pisortaq Arnannguaq Heilmann Christensen taama oqarpoq.
Aggustip naajartornerani sulinngiffeqarfik qaangiutissaaq, taamaasillunilu utoqqaat illuini sulisut sulinerat nalinginnaasumut uteqqittussaassalluni. Ajornartoorfiup nalaani utoqqarnik sullissivimmi pisortaq ilaqutaasunut kaammattuuteqarpoq.
“Sulisut ulapittupilussuupput suliassaminnillu pingaarnersiuisariaqarlutik, taamaammat qularutiginngilara utoqqaat ilaquttaminnit pulaarneqarlaarnissaat sulisunit iluarineqassasoq”, Arnannguaq Heilmann Christensen oqarpoq.
Sulinngiffeqarnermit napparsimasoqarneraniillu unammillerneqarneq sapaatit akunnerini marlunni pinissaa naatsorsuutigineqarpoq.