Isumaginninneq Meeqqat, Inuusuttut Ilaqutariillu Services

Pisortaq: Tasiilaq maanna paasisaqarfiginerulersimavara

Qaammatini marlunni Kommuneqarfik Sermersuumi Meeqqanut Ilaqutariinnullu Ingerlatsiviup pisortaa Tasiilami allaffeqarsimavoq. Tunumiinneq marlunnik siunertaqarsimavoq. Ilaatigut pisortap aqutsisutut atorfik inuttaqanngitsoq taartaavigiartorsimavaa, kisianni Martha Abelsenimut illoqarfiup isumaginninnermut suliassaqarfimmi sorpassuartigut ikioruminaatsutut isigineqartup ilisimasaqarfigilernissaa pingaarnerpaasimavoq.

”Tasiilaq paasisaqarfigissagukku, illoqarfimmi atorfillit minnerpaamik qaammatini marlunni peqatiginissaat uannut pingaaruteqarsimavoq. Ulluinnarminni suut unammilligassarineraat aamma taakku aaqqiivigissallugit suut pisariaqartinneraat paasisaqarfigissavakka”, oqarpoq Martha Abelsen.

Taamaalilluni Martha Abelsen sapaatit akunnerini arfineq marlunni atorfimmi suliassaqarluni angalasimavoq, kisianni tamanna assut naleqarsimavoq.

”Maaniinnera assut pissarsiffiusimaqaaq. Illoqarfimmi unammilligassat qanoq ittuunersut paasisaqarfigilluarsimavakka. Tasiilami Meeqqanut Ilaqutariinnullu Ingerlatsivik Nuummi taamaaqataatut angitigaaq. Soorlu Nuummisut ingerlatsivik najukkanut assigiinngitsunut siaruarneqarsimavoq, tamannalu pissutigalugu sulisut tamarmik assut immikkooqqallutik sulisarsimapput. Taamaattumik uanga suleqatigiinnissamut toqqammavissaq suliarisimavara”,  Martha Abelsen oqaluttuarpoq. 

Nuummi ingerlatsivimmik suleqateqarneq aamma Tasiilamut unammillernartoqarsimavoq. Atorfillimmi akulikitsumik aqutsisuugallartunik suleqataagallartunillu suleqateqartarneq misigisarsimavaat, tamannalu ilaanni assut paatsiveerunnermik pilersitsisarsimavoq.

”Avataanit ikiuukkiartorlutik tikittartut ikiuuttussaapput. Maani sulisut pisariaqartitaminnik atugassaqarnerat isumagisussaavaat. Tasiilami atorfilittatta pisortat avataanit tikittartut qaammatinilu pingasuni maaniittartut tamanillu allanngortiterisartut akulikippallaamik misigisarsimavaat. Taamaattumik paasissutissanik toqqammavissaq ineriartortinneqanngisaannarsimavoq. Suleqatit pingaarutillit tassaapput maani najugaqartut aamma Tasiilaq suliffimmittut isigigaat, aamma ukiorpassuarni maaniinnissaminnik eqqarsaateqartut. Atajuarnermik aamma sumiiffimmi ilisimasanik qulakkeerinnissinnaapput. ”

Isumaginninnermi siunnersortinik ilinniarsimasunik Tasiilami atorfinitsitsiniarneq unammillernartoqarpoq, taamaattumik Meeqqanut Ilaqutariinnullu Ingerlatsiviup illoqarfimmi sulisut pikkorissaqqinniarpai.

”Tasiilami isumaginninnermi pigaartut Nuummiiittunut naleqqiullugit amerlanerusunik aggersarneqartarput. Ajornartorsiutip ilaa annertooq tassaavoq Tasiilami innuttaasut politiinut sianernatik isumaginninnermi pigaartumut sianertarnerat. Innuttaasup inersimasoq meeqqamut persuttaasoq takuppagu, tamatumunnga politiit akuliunnissaq suliassaraat, tamatumalu kingorna uagut meeqqap toqqissisimanartunik avatangiiseqalernissaa qulakkeertussaavarput, kisianni isumaginninnermi pigaartoq politiit aallartitaatut atuuffeqarsimavoq, tamannalu taakkununnga assut artukkiisarsimavoq”, oqaluttuarpoq Martha Abelsen.

Martha Abelsenilu sivisuumik illoqarfimmiinnermini aamma inuiaqatigiit qanoq ittuunerat paasisaqarfigisimavaa.

”Annertuunik unamilligassaqartoqarnera assortorneqarsinnaanngilaq. Inissiisarnerit assut amerlapput, taakkulu pinngitsoortinnissaat pikkoriffiginerussavarput. Ilaqutariit suleqatigalugit siumut sammisumik pilersaarusiortarnissaq pikkorinnerulerfigisariaqarparput. Suulli tamarmik ajortuinnaanngillat. Ingerlalluartunik ilaqutariippassuaqarpoq tusagaqarfiginngisaannakkatsinnik”, Martha Abelsen oqaluttuarpoq.

Tamatumunnga peqatigitillugu illoqarfimmi amerlasuunik pitsaasunillu suliniuteqartoqartoq oqaatigaa:

”Ullormi akissarsiffimmi imigassartaqanngitsumik sammisassaqartitsilluni suliniutit nuannersumik tupaallaatigaakka. Kommune illoqarfimmeersunik tamanik inunnik ataatsimoortitsillaqqeqaaq. Tallimanngornermi kingullermi arsaattarfiup eqqaani grilerisoqarpoq, pissittaarfeqarluni nipilersornertalimmillu aaqqissuisoqarluni. Qaammatip naanerani akissarsiffiup nalaa qanoq ilillutik pitsaaneruleqqullugu pilersaarusiorluartarput”, Martha Abelsen oqarpoq.

Sivisuumik Tasiilameereernermi Nuuk erininarsilersimavoq.

“Angerlarnissannut qilanaarpunga. Nuummi amerlasuunik aamma uanga peqataaffigerusutannik pisoqarpallaaqaaq”, oqarpoq Martha Abelsen, kisianni aamma neriorsuivoq Tasiilaq pisortamit kingullerpaamik sivitsukkamik tikeraarneqanngitsoq.

“Aap. Tasiilami piffissani sivisunerusuni suliartoqqittassaanga. Oktoberimi ataatsimiinnermut atatillugu ulluni 14-ini maaniissaanga.”