Services

Paamiuni innarluutillit illoqarfiup ikaartaarfiani allagartassamik sanasut

Innarluutillit sammisassaqartitsiviaani Nuilaami atuisartut illoqarfiup ikaartafituaanut allagartassamik ”Paamiut Asasara”-mik allannertalimmik sanasimapput, taakkulu Najukkami ataatsimiititaliamit taperfigineqarsimapput. Allagartat sapaatip akunnerani uani nivinngarneqarpoq.

Paamiuni innarluutillit arfineq-marluk Najukkami ataatsimiititaliami taperneqarlutik allagartarliorsinnaasimapput.

”Najukkami ataatsimiititaliami pingaanermik pilersaarusiamik suliaqarnikuuvugut, tassani ilaavoq illoqarfitsinnik takujuminarsaanissaq. Taamaammat Nuilaami atuisut illoqarfitta ikaartarfiani allagartassamik sananissaanut tapiissuteqarfigissallugit aalajangersimavugut. Innarluutilittatta peqataatissinnaagatsigit nuannaarutigaarput aamma taakku pineqartut suliaallu tulluusimaarutigingaarpagut”, Najukkami ataatsimiititaliami ilaasortaq Lucia Møller-Grønvold unnersiorpoq.

Nuilaami atuisut allagartaliornissaanut periarfissinneqarsimanerat Nuilaami aqutsisup nuannaarutigaa.

”Atuisutta periarfissinneqarsimanerat nuannaarutigaarput. Allagartaliornerinnaannginnami, atuisugut arfineq-marluk OCN-imik taasakkatsinnik aamma pikkorissaatigaat. Taamaasillutik suliaqarsimanerminnut tunngatillugu aamma allagartannguamik tunineqarumaarput”, Nuilaami aqutsisoq Andrine Jensen taama oqarpoq.

Open College Network, imaluunniit ulluinnarni OCN-imik taasagarput ilinniarnermik ingerlatsiffiuvoq akuerisaasoq, tassani innuttaasut piginnaasaqarfimminni ilinniagaqarnikkut allagartartaarsinnaallutik. Open College Network periusiuvoq pisortatigoortumik ileqquusumillu ilinniartitaanerup avataatigut piginnaasanik ilikkakkanillu naleqarluartitsisoq.