Services

Nuup timaani aalisarneq mamakujuttunillu ujarlertitsineq

Kommuneqarfik Sermersooq meeqqanut inuusuttunullu aasaanerani assigiinngitsunik sammisaqartitsivoq sammisaqartitsinermilu ataatsimi sapaatip-akunneranik sivisussusilik Two Ravens peqatigalugit Summer Camp ingerlanneqarluni. Assit takukkit uani.

”Summer Campertitsinitsinni meeqqat pinngortitamiinnissaat siunertaraarput. Nuup timaa nunarujussuuvoq atorluagassarput” Thorlak Skifte Nielsen oqarpoq eqqaaniippullu meeqqat arfineq-pingasut qissattarujoortut.

Meeqqat ilaat minutsit quliinnaat ingerlanerini aalisarujoortilluni suaarpoq ”Pisaqarpunga!” kinguninngualu sumik pisaqarsimasoq takuniarlugu meeraqatai alakkarteriartorput.

Sunaaffa aalisagarpaalunnik qalluinialeramik. Kingorna aalisakkat igamut immamit immeriarlugu qalaartinneqannginnerini salinneqassapput.

“Kaar! Assagiarsuttorsimavoq!” meeqqat ilaat taama oqarpoq aalisakkap pisani anginerpaap aqajarua ammartermassuk. Meeqqat alaatsinaaqalutik aqajaruinik ammarteripput aalisakkat sutortarnersut paasiniassagamikku.

Pinngortitami nerineq

Meeqqat alaatsinaannerit aalisakkat igamut ikineqartinnagit uummataannik ooqanngitsunik misiliitinneqarput. Igami imeq qalassiisaa meeqqat qaqqami mamakujuttunik ujarlertinneqarput taamaaliortinneqarnerminnilu nunap assingata atuarnissaanut qanorlu atornissaanut sungiusartinneqarput.

Meeqqat ujarlertinneqareeramik kaasarfitik mamakujuttunik ulikkaarlugit uteramik qalaqqaamik saarullittortinneqarput angerlamullu utinnginnerminni tamarmik mamarsarlutik neripput.

Meeqqat pinngortitamiitinneqarnissaannik anguniagaqarneq iluatsittutut taasariaqarpoq. Mamakujuttunik ujarlertitaanermik, aalisarnermik, nerisassiornermik kissalaartumillu kakaoitornermik imaaniit qaqqamiillu ajoriinnagassaanngitsunik misigisaqartinneqarput.

Aasaanerani pilersaarutit assigiinngisitaartut ilaat

Namminersortut assigiinngitsut kommunimit attavigineqarput, matumanilu aasaanerani atuanngiffeqarnerup nalaani atuarfiit matoqqanerinni Two Ravensimik suleqateqarneq sammisassaqartitsinermik neqerooruterpassuit ilamininngui.

”Sammisassat assigiinngitsorpassuusut aaqqissuutaraavut sapinngisamillu amerlanerpaat sammisaqartinniarlugit assigiinngitsunik ukiullit matumani pineqarput. Meeqqat nuannisarsimasut aaqqissuisunit eqqaaneqarmata pisuunnguallattutut misigineqarpoq” borgmesteri Avaaraq Olsen taama oqarpoq.

Sammisassaqartitsinerit ilagaat Summer Camp tassanilu pinngortitap meeqqanit assigiinngitsutigut atorneqarnera assini uani takuneqarsinnaavoq: