Kommuneqarfik Sermersuup nammineq piumassuseq tunngavigalugu suliniuteqarneq pingaartitaraa, ukiumullu marloriarluni aningaasaliissuteqartarpoq Peqatigiiffiit namminerlu kajumissutsimik suliaqartunut, sulilu aningasaliiffigineqarnissamik qinnuteqarsinnaapput.
Nuummi Unnuarissat unnuami inuusuttuaqqat toqqissisimasumik inuuneqarnissaat pillugu nammineq kajumissutsimik suliaqartuupput, kiisalu annersaaneq aserorterinerlu taamaaliornermikkut pinaveersaartikkumallugu suliaqartuupput. Taamaattumik unnukkut unnuamilu illoqarfimmi takussaasarput, sukkuaqqanik inuusuttuaqqanut agguaasarput oqaloqatiginnittuusarlutillu.
Aningaasaliissutigineqartartut inuusuttuaqqanut iluaqutaasarput.
Aningaasaliissutinik agguaassinermi inuttut peqqissutsimullu ajornartorsiutinik suliniuteqarneq tapersiiffigineqassaaq aammalu Kommuneqarfik Sermersuumi isumalimmik pilerinartumillu kajumissutsimik suleqataasarnissaq siuarsaaqataaffigerusullugu. Nuummi Unnuarissat Kommuneqarfik Sermersuup aningaasaliissutigisartagai sumut atussanerlugit ilisimareerpaat.
”Unnuarissanut aningaasaliissutigineqartut, pissarsiarisavut qujamasuutigaavut, taamaalilluta suliniutitta illoqarfimmut iluaqutaasumik ingerlannissaanut periarfissinneqartaratta. Aningaasaliissutigineqartut Unnuarissanut tunngaviusumik pikkorissarneqarnerinut, ikiueqqaarnermut pikkorissarneqarnerinut, tarnikkut ikiueqqaarnermut pikkorissarneqarnerinut atorneqassapput kiisalu Nuna tamakkerlugu Unnuarissat katerisimaartinneqarnerinut peqataanissamut aammalu ullormut paasissutisseeqatigiiffiusumut, sukkuaqqanillu pisiniarnermut atorneqassallutik” Nuummi Unnuarissat siulittaasuata Niels Nielsen taamak oqarpoq.
Tapiiffigineqarnissamut qinnuteqartarneq
Suliniaqatigiiffiit, peqatigiiffiit kiisalu inuit ataasiakkaat isumaginninnikkut namminneq kajumissutsiminnik suliniartut tapiiffigineqarnissaminnik qinnuteqarsinnaapput.
Suliniummi napparsimasut, sanngiitsut, inuuniarnikkut aarlerinartut inuuniapiloortulluunniit sullinniarneqarput. Aningaasaliissutit pillugit atugassarititaasut malillugit qinnuteqartoqarneratigut tapiissutit agguataarneqartarput.
Kingusinnerpaamik qinnuteqarfissaq tulleq tassaavoq 1. oktobari.
Nammineq kajumissutsimik suliaqarnissamut atugassanik qinnuteqassaguit piumasaqaatit qinnuteqarnissamullu immersugassaq uani nassaarisinnaavatit: https://sermersooq.gl/da/tilskud-til-frivilligt-arbejde-med-et-socialt-sigte/