Atuarfeqarneq Services

Nuummi atuarfittaassap iluani sisooqattaarfissaqassaaq

Nuummi atuarfittaassaq illoqarfiup qeqqaniittoq piareerpat, timimik aalatitsinissaq periarfissaalluarumaarpoq. Assersuutigalugu meeqqat nukarliit ammukarnialerunik aalajangersinnaassavat sisoortarfikkut sisoorniarnerlutik imaluunniit tummeqqakkut ammukarniarnerlutik. Atuarfittaassami timimik aalatitsinissap periarfissaalluarnera borgmesterip nuannaarutigaa.

Nuup meerartai atuarfittaassami atualertussat illup iluani silataanilu timiminnik aalatitsilluarnissaminnik periarfissagissaartussaapput.

Borgmesteri Avaaraq Olsen atuarfittaassaaq alakkarsimavaa, ilinniartitsisuusimasutullu takusimasani nuannarai.

”Atuartitseqinnissannut pilerusulerpunga. Ilikkarsarnissamut avatangiisit pitsaapput, sammisaqartitsinissamut eqqissisimaarnissamullu atorneqarsinnaallutik. Tamanna ilinniartitsisut sammisaqartitsiutigalutit atuartitsinissaannut periarfissiilluarput”, Avaaraq Olsen oqarpoq.

Immikkut taaneqarsinnaasoq tassaavoq illup iluani sisooqattaarfissaq (danskisut rutsjebane), tamanna meeqqat pinnguarnissaannut periarfissiissaaq, borgmesterillu tamanna nuannaarutigaa.

”Meeqqat pinnguarusussuseqarnerat illup ilusilersorneqarnerani eqqarsaatigineqarsimammat eqqarsarluarnertut nalilerusuppara. Atuartuuguma, toqqagassinneqarlungalu tummeqat imaluunniit sisoortarfik atorlugu ammukarnissanut, nalunngilara sorleq toqqassanerlugu”, Avaaraq Olsen oqarpoq.

Meeqqat sukkasuumik nuannersumillu ammukasinnaanissaanut periarfissiinerup saniatigut neriuutigineqarpoq sisooqattaarfissaq atorluarneqarnerani meeqqat tummeqqakkut majuaqattaarnerisigut timiminnik aalatitsinerulernissaat