Innuttaasunut

Katersugaasivinni aasaanerani nuannersumik ulappunneq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ukiuni marlunni aasaanerani corona pissutigalugu killilersuisoqareersoq, aasaq manna allaaneroqaaq. Allaanerussummut malunnaataalluartut tassaapput takornariartaassuit tikerartut aammalu takornariarpassuit illoqarfinni angalaartut. Nuummi Paamiunilu katersugaasiviit avataaniit ornigarluarneqarnertik aamma malugaat.

Hanseatic Nature juulip 16-iani takornariartaassuaq Paamiunut tikittut siullersaraat. 200-nik ilaasoqarami illoqarfimmut 1200-nik innuttaasulimmit malugineqarsinnaalluarpoq.

”Takornariaqaqqilernera nuanneqaaq, aamma takornariartaassuarmi sulisut nuanneqaaq Paamiunukaqqissinnaanngoramik. Katersugaasivitsinnut pulaarput takusassaatigullu assigiinngitsut isiginnaarujoorlugit”, katersugaasivimmi inuussutissarsiornermilu suleqataasoq Augustine Rosing oqarpoq.

Takornariartaassuaq taannaqqissaaq aamma Nuummut tikeraarput, tikimmallu Nuummi eqqumiitsulianik saqqummersitsivimmi malugineqarpoq.

”Ukioq manna Hanseatic Nature immikkut maluginiarsimavaatigut. Ilaasorpassui saqqummersitsivitsinnut aqqusaarput, tamannalu nuannaarutigeqaarput”, Nuummi eqqumiitsulianik saqqummersitsivimmi katersugaasivilerisoq Hanne Kirkegaard oqarpoq.

Takornariartaassuit sisamat Paamiunut tulattussaagaluit sila pissutigalugu ajoraluartumik tulanngitsoorsimapput.

“Naatsorsuutigaarput septembarip tungaanut takornarissat 3000-it missaaniittut Paamiunut tikissasut. Aasakkut takornariartaassuit tikittartut saniatigut aamma akuttunngitsumik staycationeriartunik naammattuuisarpugut kiisalu avataaniit takornari ssat timmisartorlutik tikittoqartarluta” Augustine Rosing oqaluttuarpoq.

Katersugaasivik Nuutoqqami junimi ullormi pulaartut 20-t missaanniittarsimapput julimilu pulaartut marloriaatinngorlutit 40-t missaaniilersimapput. Inuiattut ullorsiornitsinni rekordiliisoqarpoq, pulaartut 700 nallermagit.

“Turistinik isertoqaaluttaqaagut. Ilaat takornariartaassuarmeersuusarput ilai allanit, taamaammat pulaartartugut assigiinngeqaat. Najugaqavissunit pulaarneqartarpugut, aamma inuit pulaartut qungujullugit tikilluaqqujuaannassavagut, siullermeerlutik imaluunniit qulissaanik pulaarpata”, Katersugaasivik Nuutoqqami sulisoq Josephine Holding oqarpoq.

Jim Lyngvildimit aasaq manna saqqummersinneqartoq “Inorrooq / Hamskifteren” immikkut maluginiarneqarsimavoq, aamma katersugaasiviup erlinnartuutaa, Niels Lyngep illua alakkarneqarluarsimavoq. Taakku saniatigut Anne Mette Holmip nammineq kajumissutsini atorlugu Nuummi Paamiunilu meeqqanut sammisaqartitsisimavoq.

Nunaqavissunut aamma atorluarneqartut

Kommuneqarfik Sermersuumi katersugaasiviit amerlanerpaartaat ukioq kaajallallugu ammasarput, taamaattumillu takornarianut nunaqavissunullu assigiinngitsorpassuarnik takutitassaateqartarlutik, saqqummersitsisoqartillugu imaluunniit aaqqissuisoqartillugu ukioqatigiiaat tamarmik tamatigorluinnangajak saaffigineqartarlutik.

Soorlu Paamiuni Katersugaasiviup aasaanerani meeqqanut aaqqissussaat assigiinngitsut ingerlassimagai.

“Aggustip aallartilaarnerani meeqqanut sammisassaqartitsivugut, tassani tippi ikaartiterlugu assilialiornermik sammisaqartinneqarlutik. Meeqqanut sammisassaqartitsisinnaanerput nuannaarutigeqaarput”, Augustine Rosing oqarpoq.

Augustine aamma oqaluttuarpoq Paamiuni Katersugaasiviup 40-runngortorsiornissaanut atatillugu nalliuttorsiornissamut pilersaarusiuleruttorlutik. Ullut sammisassallu inissivinneqareeriarpata avammut nalunaarutigineqarumaartut oqaatigalugu.

Nuummi eqqumiitsulianik saqqummersitsivimmi pulaartut ukiuni marlunni aasaanerani ammerleriarsimaneri malugineqarpoq, coronammi ajornartoortitsinerani aaqqissuussiniarnerneq ajornarnikuusimanera peqqutaalluni.

Aasaq manna saqqummersitsineq “Puilanerit – Grafisk Værksted” takusarneqarsinnaasimavoq, taanna tassaavoq Grafisk Værkstedimut nersorinnissutaavoq, ammarneraniit ukiut 50-it qaangiunneranni.

“Taanna aasaanerani saqqummersissallugu aalajangersimavarput takornariat Kalaallit Nunaanni eqqumiitsuliornerup oqaluttuarsartaanik aamma takusaqarsinnaaniassammata. Saqqummersitsineq eqqumiitsuliortariaatsi llu assigiinngitsut takutippai, taamaasilluni soqutiginnissinnaasunut assigiinngitsunut saaffiginnittuulluni”, Hanne Kirkegaard oqarpoq.

“Puilarnerit – Grafisk Værksted” saniatigut saqqummersitaq ”Ukaleq; naammassineqanngitsoq” Anne-Birthe Hovep suliaa saqqummersinneqarpoq. Taassuma inissianik quleriaanni Svend Jungesvejimi (Jagtvej) kusassaatitut suliarisimasai qanoq suliarineqarsimanersut saqqummersitsivoq, nuannarineqaqisumik. Pulaartut aperisarsimapput inissiat taakku sumi inissismanersut, nammineerlutik alakkarniarlugu aperisarsimallutik, Hanne Kirkegaard oqaluttuarpoq.