Atuarfeqarneq

Ilinniartitsisut suliffissaminnik nutaamik alakkaasut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

USK-imi ASK-imilu ilinniartitsisut kiisalu atuareernerup kingorna ornittakkani Illumi Narsarmiutamilu sulisut ulluni makkunani Hotel Hans Egedemi katersuupput, taakkumi atuarfik 2024-mi ammarneqarpat suleqatigiilertussaapput, taamaattumik imminnut ilisarilerniarlutik aammalu suliffimmi suleqatigiilernissamut piareersarniarlutik naapipput. Tassani ilaatigut ilusilersuisartut assit aalasuliallu atorlugit atuarfittaassaaq takutinneqarluni – atuarfiup iluani rutsjebanissaq ilaatigut takutinneqarluni.

Nuummi atuarfittaassap atulernissaanut piareersarneq aallartereerpoq, piareersarnerillu assigiinngitsut ataatsikkut ingerlanneqarput. Taakkununnga ilaavoq sulinermi pissusissamik ataatsimoorussassamik pilersitsinissaq, atuarfiit marluk ataatsimuulerpata atorneqartussaq. Tamanna aamma ilinniartitsisunut, pedellinut, Illumi Narsarmiutamilu sulisunut kiisalu allat atuarfeqarfimmut attuumassuteqartunut atuuppoq.

”Pissangaqaagut. Ataatsimoorluta pilersissinnaasatta takunissaa soqutiginarpoq. USK-i ASK-ilu assigiinngissuteqalaartut malugineqarsinnaavoq”, ASK-imi ilinniartitsisoq Hendrik Mørch oqarpoq.

Sulisut siusissukkut peqataatinneqarnissaat pingaaruteqartoq

Sulinermi pissusissamik ataatsimoorussassamik suliniuteqalereernermut pissutaasoq tassaavoq, piareersarnermi sulisut sunniuteqarsinnaanissaannik Kommunip periarfisseerusunnera, Inerisaanermut pisortaq Jill Raarup-Hellesen tikilluaqqusinermi nassuiaavoq.

Ilinniartitsisut najuuttut pissangarpasillutik issiavimminniit malinnaapput, taakku issiaviit nammineerlutik toqqagarinngilaat nalaatsortumilli inissat agguarneqarsimapput. Tassunga pissutaavoq peqataasut ilisimalluinnakkamik eqqaannut inginnissaat pinaarveersaarneqarmat. Taamaasillunilu USK-imi ASK-imilu sulisut akulerussimasut aallaqqaataaniillu isumassarsioqatigiinnermi suleqatigiittussanngorlutik.

Siuttunik illersorneqassaaq

Illorsuaq nutaarsuaq nutaalianik atortorissaaruteqarluni avatangiiseqarpoq, atuartussanut ilinniartitsisussanullu iluaqutaasussanik. Kommuni atuarfeqarfimminnut angusaqarluarniarneranut suliniuteqarneranut qulakkeerinninnissaanut alloriarneruvoq pingaarutilik, meeqqat alapernaatsut, qajannaatsut, peqqissut nuannaartullu pilersinneqarnissaat kiisalu atuartut amerlanerpaartaat ilinniakkamik aallartitsinissaanut qulakkeerinnittussaq.

“Perorsaasuugaanni, ilinniartitsisuugaanni, pedelliugaanni imaluunniit allaffiummiuugaanni tamatta meerartatta inersimasunngornissaminnut piareersarneranni sunniuteqaqataavugut. Suleqatigiinnikkut anguniakkavut angussavagut” Meeqqanut Atuarfeqarnermullu Ingerlatsivimmi pisortaq, Lone Nukaaraq Møller oqarpoq.

Sulisut atuarfinni marlunneersut maanna sulinermi pissusissamik pilersitsinissamik suliniuteqarnerat ingerlaqqissaaq.