Kulturi Oplevelser Sunngiffik

Sermiligaaq 100-rujuliivoq

Nunatta kangiani, Tunumi nunaqarfik Sermiligaaq ullumikkut juulip 14-ianni 100-rujuliivoq. Tamanna arfininngorpat nalliuttorsiutigineqalerpat nunaqarfinni aqutsisuni ilaasortaq Peter Utuange aamma nalliuttorsiornermut atatillugu ataatsimiititaliami siulittaasoq Simujoq Taunajik oqalugiassapput, nereqatigiittoqassaaq, innuttaasunut assigiinngitsunik sammisassaqartitsisoqassaaq kiisalu naalagiaqatigiittoqassalluni.

Nalliussineq sapaatiuppat nangeqqinneqassaaq, tassani angoqqaanniuuttoqarlunilu naalagiareernermi kransiliisoqassalluni.

Kommuneqarfik Sermersuumi borgmesteri Avaaraq Olsen nunaqarfimmiunut pilluaqqusivoq.

”Sermiligaami innuttaasut pilluaqqungaarpakka. Nunaqarfiit arlallit inuerukkiartortut, nunaqarfik ingerlalluartoq takusinnaallugu nuannerpoq, aammalu innuttaasut nukissaqarluarlutik nammineerlutik aaqqissuussisut takusinnaallugit tulluusimaarnaqaaq, taamaasillutik innuttaasut tamarmik sapaatip akunnerata naanerani nalliuttorsiorsinnaanerat piviusunngortippaat”, Avaaraq Olsen oqarpoq.

Sermiligaaq ullumikkut 195-inik innuttaasoqarpoq. Nunaqarfiup innuttaqassusaa ukiuni 20-ni aalajaatsumik inissisimasimavoq, innuttaasut 200-ut missaaniittarlutik. Nunaqarfik ullumikkut atuarfeqarpoq 30-nik atuartulimmik, paaqqinnittarfeqarpoq kiisalu ukioq kaajallallugu sermiliup eqqaani qaleralinniartartunik arlalinnik aalisartoqarluni. Nunaqarfiup ilisarnaatigaa peqatigiiffilerinerup tungaatigut ingerlalluarnini aammalu Kommuneqarfik Sermersuumi nunaqarfinni kisiartaalluni namminerisamik innuttaasut katersuuttarfiannik ingerlataqarluni.

Sermiligaaq Tunumi nunaqarfinni sermersuarmut qaninnerpaatut inissisimavoq.