Services

Sermersuumi aqutsisut nutaat aallartilluarnerussasut

Immikkoortortaqarfimmi, atuarfimmi meeqqerivimiluunniit pitsaasumik innuttaasunik sullissinermi aqutsisut pingaaruteqartupilussuupput. Taamaammat Kommuneqarfik Sermersuumi aqutsisunngorlaat ukkatarineqalerput. Aqutsisut aallartilluarnissaat anguniarlugu aallarniutitut pikkorissarneqarlutik.

Aaqqissuussami politikkikkut aqutsiffiusumi qanoq sulisoqartarpa? Aqutseriaatsimut tunngavissaq suua? Sulisoqarnermi immikkoortortaq sulerisarpa aammalu kommunip pisiortornermi politikkia qanoq sinaakkuteqarpa. Kommuneqarfik Sermersooq suliffeqarfiuvoq angisoorujussuaq assigiinngitsorpassuarnillu suliaqarfiusoq, ingammik aqutsisunut. Kommuneqarfik Sermersuumi aqutsisunngorlaat aallartilluarnissaat anguniarlugu allarniutitut pikkorissarneqarput.

“Kommuneqarfik Sermersuumi isumaqarpugut, suleqatitaatta kajumissuseqarnissaannut suliallu nuannersutut misiginissaannut qaammatit siulliit pingaaruteqartupilussuusut. Taamaammat onboarding (aallarniutitut pikkorissaaneq) ukkataralugu pingaartipparput, taassuma qulakkiissavaa aallaqqaataaniillu ataatsimooqataalluarnermik misigisimanissaq, suliassanik ilisimaarilluarnissaq kiisalu aaqqissuussaanermi sullivimmilu kultoorimut akulerutipallannissaq”, Aaqqissuussaanermut Ineriartortitsinermullu Immikkoortortaqarfimmi pisortaq Kattie Pedersen taama tunngavilersuivoq.

Ulloq manna tikillugu marloriarluni aqutsisunut aallarniutitut pikkorissaasoqarpoq, ilitsersuisullu angusanut iluarisimaarinnipput.

”Pimoorussilluni peqataasoqarnera misigaarput. Aqutsisullu aaqqissuussaanermi immikkoortortat akimorlugit naapinnertik misilittakkanillu avitseqatigiinnertik iluarivaat”, ineriartortisinermut siunnersorti Majbritt Friis-Veng taama oqarpoq.

Malik Skifte ungasinngitsumi Majoriaq Nuummi centerlederinngoqqammerpoq, taamaammallu siullermeerluni kommunimi aqutsisoqatini qanimut naapippai.

“Aqutsisut allat naapillugit iluarpoq. Uanga assigalunga aqutsisut nutaajusut naapippakka, kisianni aamma aqutsisooreersut peqataapput. Immitsinnut oqaloqatigiilluarpugut aammalu kommunip iluani suliaqarfiit allat paasissutissanik allanik paasiniaaffiginissaannut sakkussanik tunineqarluarluta”, Majoriaq Nuummi centerlederi Malik Skifte unnersiorpoq.

Aqutsisunut nutaanut aallarniutitut pikkorissartitsinerit aappassaraat, pikkorissaanermilu aqutsisut 22-t peqataapput. Aallarniutitut pikkorissaanerit qaammatit pingasukkaarlugit ingerlanneqartartussaavoq.

Aallarniutitut pikkorissaanerit Kommuneqarfik Sermersuup suliniutaanut, Kivitsisuuvugummut ilaavoq.