Eqqakkat Avatangiiserlu Uumasut Pingortitarlu

Innuttaasut Nuup kangerluanut eqqakkanik katersuiartortut

Angallat innuttaasunik 16-inik nammineq kajumissuseq atorlugu eqqakkanik katersuiartortunik issimasulik arfininngornermi juulip 16-ani Nuutoqqamiit aallarpoq. Taakku siunertaat tassaavoq, eqqakkat sapingisamik amerlanerpaat katersussallugit.

Nuup kangerluani eqqakkanik katersuinissamik Nuuk Water Taxi aaqqissuinialermat innuttaasut arlaqartut peqataarusullutik tutsiussimapput. Katja Pedersen januaarimiilli Nuuk Water Taximi ingerlatsinermi ataqatigiissarisutut suliaqarpoq, taanna suliniummi aaqqissuinermi aqutsisuuvoq.

”Katersinissatsinnut aalajangersimanitsinnut peqqutit arlaqarput. Sulisugut amerlanerpaat sulinerat imaani pisarpoq. Eqqakkat puttaannartut naammattoortuartarpaat, tamannalu iliuseqarfigerusuppaat. Aamma illoqarfitsinni maangaannaq eqqakkat takornarianiit maluginiarneqartarput, ingammik apuk aaqqammeraangat. Piujuartitsineq aallaavigalugu ineriartortitsineq aammalu FN-ip nunarsuarmi anguniagai sulinitsinni ilaalluinnarput suliffeqarfitsinnilu ilisarnaataallutik. Aamma pinngortitamik paarsilluarnissaq pissusissamisuuginnartut isigaarput”, Katja Pedersen oqaluttuarpoq.

Nuuk Water Taxi Nuup kangerluani eqqakkanik katersuititsinera siulliunngilaq. Ukiut marluk qaangiupput siullermik katersuititsillutik aaqqissuimmata, piffissallu ingerlanerani suliniummut ikiuunnissamik soqutiginninneq annertusiartuinnarsimavoq.

Ukioq manna aaqqissuussamut innuttaasut 16-init nalunaarsinnaatitaapput, naak piffissap sivikitsup iluani inuit 55-it nalunaarsimagaluartut. Takornariartitsinermik suliaqartut ulapileruttorfianni angallatit atorneqarsinnaasut killeqarput, taamaammat nalunaartut siulliit 16-init taamaallaat peqataasinnaasimapput. Soqutiginninneq annertooq Nuuk Water Taxip aaqqissuusseqqinnissaanut kajumilersitsivoq, takornariartitsinermik suliaqartut ukiami eqqissiimeriarpata assingusumut aaqqissuusseqqinnissaq pilersaarusiorneqaleruttorpoq.

“Suliniutitta tigulluarneqarnera aammalu pinngortitamik paarsilluartoqarusunnera uagutsinnut tuppallernaqaaq. Tullissaani aaqqissuusseqqilerutta neriuppugut angallatit amerlanerusut atorsinnaassallutigit, taamaasilluta avataangiisitsinnut ajunngitsuliorusuttut tamarmik peqataasinnaaniassammata”, Katja Pederasen naggasiivoq.

Nammineq kajumissuseq atorlugu eqqakkanik katersuisunut sassaalliutissat neriniartarfimmit Killummit tunissutigineqarput, eqqakkallu imaaniittut nunamiittullu katersorneqarnerani atortut, puussiat aaqqatillu Kommuneqarfik Sermersuumit tunniunneqarlutik, aamma eqqakkanik tigooravik eqqakkat katersorneqartut assartorneqarnissaat isumagivaat.

Kommuneqarfik Sermersuumi Avatangiisinut immikkoortortami aqutsisoq Jakob Kofod oqaluttuarpoq suliniutit taamaattut tapersersorusullugit.

“Innuttaasut aammalu suliffeqarfiit namminersortut avatangiisitsinnut iluaqutaasussanik suliniuteqarnerat nuannersupilussuuvoq. Nalunngilarput Nuummi innuttaasut amerlanerpaartaat pinngortitamik paarsilluartuusut. Taamaattorli innuttaasoqarpoq maangaannaq eqqaasartunik, illoqarfitsinni timaanilu, taamaasilluni eqqakkat sumi tamaani takussaalersarlutik. Ingappoq plastikkit, naggataatigut piniagassanut pisartut”, Jakob Kofod oqaluttuarpoq.

“Nammineq kajumissuseq atorlugu eqqakkanik katersisunut qujassutissaqaqaanga, aamma neriuppunga innuttaasut siunissami avatangiisitsinnik paarsilluarnerulissasut, taamaasilluta suliniutit taamak ittut pisariaqarunnaarniassammata”, Jakob naggasiivoq.

Nammineq kajumissuseq atorlugu eqqakkanik katersisimasut tikinnerannit assit takukkit: