Services

Tusagassiutinut nalunaarut: Grafisk Værkstedip ammarneranit ukiut 50-inngornerat saqummersitsivimmi nalliuttorsiutigineqassaaq

Eqqumiitsuliortut Hans Lyngep aamma Bodil Kaalundip ukiut 50-it matuma siorna Grafisk Værksted Nuummi ammarpaat. Tamanna Nuummi Eqqumiitsulianik Saqqummersitsiviup saqqummersitsinermik malunnartinniarpaat. Ammaanersiorneq Inuiattut Ullorsiornermi nal. 15 pissaaq.

Grafisk Værksted 1972-imi ammarpoq, 1980-imilu Eqqumiitsuliornermik Ilinniarfinngorluni. Hans Lyngep Bodil Kaalundillu, tamarmik eqqumiitsuliortuulllutillu atuakkiortuusut, taamani nammineq suliniutigalugu Nuummi uffariartarfitoqqami ammarpaat. Canadami Cape Dorsetimi naqiterivimmit isumassarsiarisimavaat. 1972-ip 1980-illu akornanni naqitereriaatsinik assigiinngitsunik pikkorisaasoqartarsimavoq, soorlu ujaqqanit naqiterinerit, annoraaminernit naqiterinerit, kanngussammit naqiterinerit, linoliummimillu naqiterinerit.

Ukiut ingerlanerini naqiterivik nuimasunik aqutisoqartarlunilu ilinniartitsoqartarsimavoq; Emil Rosing, Jessie Kleemann aamma Jessie Kleemann taakkununnga ilaallutik. Ilinniartut Kalaallit Nunaannit iluitsumit tikittarsimapput, assigiinngitsunillu tunuliaquteqartarsimallutik – piniartut, aalisartut, angerlarsimaffinni ningiut, umiartortut inuusuttullu eqqumiitsuliornermik soqutigisallit. Jessie Kleemann, Anne-Birthe Hove, Frederik Kristensen ’Kunngi’, Aka Høegh aamma Thue Christiansen taakku ilagisimavaat.
Grafisk Værkstedimit eqqumiitsuliat katersat Nunatta Katersugaasiviata Allagaateqarfiatalu katersugaataannut ilaapput, tassanngaanniillu eqqumiitsuliat 90-it saqqummersitsinermi atorneqarlutik. Ilinniartut naqiterinikkut, sammisaannut ersersitseriaasaannillu siammasissusaat saqqummersinneqartuni takuneqarsinnaassaaq. Sammineqartut assigiinngitsorpassuupput; asanninneq, pinngortitaq, avatangiisit qaninnerit, inuit assigi, piniarneq, silarsuarmit isumassarsiat aammalu ilisarnanngitsuliat.

Saqqummersitsinerup qulequtaraa ”Grafisk Værksted 1972-1980 // Puilanerit”. Ilinniartut eqqumiitsuliornerup silarsuaanut puilasutut saqqummertarneri, eqqarsaataat isumassarsiaallu eqqumiitsuliaasigut puilasut, aammalu ullumikkut Kalaallit Nunaanni eqqumiitsuliornermut naqiteriviup ilinniarfiullu puilanertut aallarnerfiusutut inissisimanera qulequtaani pineqarpoq.

Saqqummersitsineq aammalu atuagassiaq
Naqiterivik Grafisk Værksted amerlasuunut eqqumiitsuliortutut inuunissamut aallarnerfiusumavoq, 1980-imiillu Eqqumiitsuliornermik Ilinniarfik nunani allani eqqumiitsuliornermi ilinniarfissuarnut aqqutaasarsimalluni. 1970-ikkut kingorna Kalaallit Nunaanni eqqumiitsuliornerup ineriartulerneranut pingaaruteqarnerpaajusimanera ilimanarluinnarpoq, Kalaallit Nunaannilu eqqumiitsuliornermi tunngavilersueqataasimalluni. Taamaakkaluartoq naqiterivik ilinniarfillu pillugit paasissutissanik piniarneq ajornartarpoq. Allaaserisat sumi tamaani nassaassaasarput, atuakkalli ikitsuinnaat eqqaasimavaat, allagaateqarfimmilu allagaatit amerlavallaaratik. Aasap ingerlanerani saqqummersitsinermut atatillugu aammalu Eqqumiitsuliornermik Ilinniarfik suleqatigalugu atuagassiap saqqummersinneqarnissaa pilersaarutaavoq. Atuagassiap paasissutissanik pissarsiniartarnermik ajornannginnerusitsilernissaa neriuutigineqarpoq.

Grafisk Værkstedimi ilinniartuusimasut saqqummersitsisussat
Aka Høegh, Amalie Lennart, Angu, Ejnar Jensen, Elisabeth, Anne-Birthe Hove, Aqqa Geisler, Astrid Heilmann, Bent Warney, Ejnar Heilmann, Eliaser Qeqe, Elisa Olsen, Enok Absalonsen, Eva Marie Stoltz, Hans Manikutdlak, Henrik Johansen, Inukitsorujuk Quist, Jens Stach, Jeremias Karlsen, Jessie Kleemann, Johanne Simonsen, Jonas Zethsen, Kaka, Karl H. Olsen, Frederik Kristensen Kunngi, Lasse Davidsen, Malo Nielsen, Maqqa Karlsen, Marianne Jessen, Marie Lybert, Naja Kruse, Nikoline Kilime, Nuka Poulsen, Salomon Winding, Samo Kajussen, Thue Christiansen, aamma Tønnes Petersen.

Saqqummersitsineq Inuiattut Ullorsiornermi juunip 21-ani nal. 15 ammaanersiussaaq, 2022-milu septembarip 30-ata tungaanut takusarneqarsinnaassalluni. Eqqumiitsuliornermik Ilinniarfimmi aqutsisoq Ivínguak’ Stork Høegh peqataassaaq.
Saqqummersitsineq Namminersorlutik Oqartussanit Tips- og Lottomidlerinit aningaasalerneqarpoq, aammalu Nunatta Katersugaasiviata Allagaateqarfialu-mit eqqumiitsuliat saqqummersitsinermut artorneqarlutik.