Oplevelser

Royal Run ’22: Timimik aalatitsinerit kunngikkormiuniillu ilassinninneq

Ukioq manna Royal Runertoqarnera juuni arfernani ingerlanneqarpoq, inuillu 800-ut missaaniittut peqataapput. Seqinnarissuaq, naak nillaarimmik anorlilaaraluartoq peqataasut nuannisakutsoorput. Asserpassuit uani takukkit.

Meeraaqqat qamutertuniit utoqqaat ajaappilisartunut, assammik arsartartut nunanut allanut unammisartuisa U-20-i inuillu ilisarnartorpassuit Royal Runertoqarnerani nuannisaqatigiilluarput. Aamma innuttaasut amerlasuut arpaqataanngikkaluartik peqataapput, taakku tapersersuillutillu takutitsisunit nipilersortuniillu aliikkusersorneqarput.

”Nuannaaqaanga innuttaasorpassuit nuannaarlutik Royal Runertoqarnerani peqataammata, peqataasut tamarmik ataatsimoortitsilluarlutillu nuannatsitseqataapput, tassa arpatitsinerup siunertaa eqqorluarlugu”, ataqatigiissaarisoq Christina Christensen taama oqarpoq.

Innuttaasunik nuannatsitsisoqarnerani aamma nipilersortoqarpoq, tassani Miki Møller Lange appisimaartuulluni, Pakkalussat kalattoorlutik takutitsipput kiisalu eqaalluinnartut Nuummi Eqaarsaartartut takutitsillutik. Peqataasut Kunngissaq Frederimmit ilassineqarnissaminnik aamma periarfissinneqarput, Kunngissaq Frederiup peqataasut skærmersuakkut toqqaannartumik ilassimmagit.

”Innuttaasunik nuannatsitsinermi peqataasunut tamanut qujavugut. Aamma nammineq kajumissuseq atorlugu ikiuuttunut kiisalu aningaasaleeqataasunut qujarusuppugut”, Christina Christensen taama oqarpoq.

Arpaqataasut takissutsit assigiinngitsut pingasut arpaqataaffigissallugit toqqarsinnaasimavaat, tassa One-mie (1,6 km), 5 km aamma 10 km, aamma arpaffissaq arpassanerlugu pisussanerluguluunniit nammineq aalajangersinnaasimavaat.