Charlotte Ludvigsen, Kommuneqarfik Sermersuumi borgmesteri
Sermersuumi ineqarnermut immikkoortortami unammilligissat Deloittep nalunaarusiaanit qulaajarneqarput. Unammilligassat ilisimalikkagut siulliit ukioq kingulleq 2021-p aasaanerani paasivagut, taakkunanullu aaqqiissutissat taamanili sulissutigineqalerput. Taamanikkorniillu atorfilittaasimasut arlallit taarserneqareerput ineqarmermullu tunngasunik immikkoortortami aningaasaleeriaatsinut periutsit allanngortinneqareerlutik.
Unammilligassat imaasiallaannaq aaqqinneqarsinnaanngitsut ersarippoq, uani pisumi taamannak pisoqarsinnaanngilaq. Unammillernartumillu aaqqiissutaasussaq tassaavoq sulilluarneq, suleqatigiilluarneq aammalu kommunimi aningaasarissaarneq. Pissutsit taakku pingasut tamarmik Sermersuumi piupput, taamaammallu unammilligissanut aaqqiissutissat arlallit kommunalbestyrelsemiit qanittumi eqqartorneqartussaapput.
Kommunalbestyrelsip eqqartugassaanut ilaapput attartornissamik isumaqatigiissutit pillugit pilersaarusiornissaq, kommunip ingerlatseqatigiiffiutaanni siunissami ingerlatseriaasissaq, sanarfinermut ineqarnermullu ingerlatsivimmi nukittorsaanissaq allarpassuillu.
Taakku iliuusissat pisariaqarput, kommunip aningaasaqarnera pitsaasuunissaanut, innuttaasunut atugarissaartitsineq pitsaasoq aalajaatsuunissanut kiisalu inissiaatinik amerlanernik sanaartortoqarnissanut qulakkeerinnissallutik.
Sammisaq pillugu oqallinneq ilungersunarpoq assigiinngitsorpassuarnillu qimerloorneqarsinnaalluni. Kommunimi borgmesteritut siulersortitullu pingaartitara tassaavoq sulilluarnissamut eqqortumik pilersaarusiornissaq. Pineqartut aaqqiivigineqarsinnaalluarput, piffissamik pisariaqartitsinerput malillugu sulisinnaagutta aammalu aalajangiilluarnerit aqutsilluarnerillu pisinnaappata. Maannakkut taakku kommunitsinni pigaagut taakkulu ingerlariaqqinnissatsinnut atorluassavagut.
Ilutigalugu kommunalbestyrelsip sulilluarnissamik kiisalu innuttaasunit qinikkatut torersumik ataatsimoorluta aaqqiisutissanik suleqatigiinnissarput pisariaqarpoq. Aaqqiisinnavugut, suleqatigiinnissarpulli pisariaqarpoq immitsinnut politikkikkut ajoqusersorluta kimmaatiinnarnrata. Kommunalbestyrelsimi ilaasortat tamarmik suleqatigilluarnissaanut qilanaarpunga.