Charlotte Ludvigsen (IA), Kommuneqarfik Sermersuumi borgmesteri
Sermersuumi ineqarnermut sanaartornermullu tunngasut nutarteriffigineqassapput. Iluarsartuussisoqassaaq, iluamik isumatusaartumillu taamaaliussaagut. 2016-imi 2017-imilu kommunalbestyrelse aalajangiivoq Nuuk City Development (NCD) pilersinneqassasoq. Tassunga pissutaavoq atuarfiit pisoqalisut nutaanik taarsernissaat, aammalu Nuummi meeqqat inunngorartorpassuit eqqarsaatigalugit meeqqerivinnik sanaartortoqarnissaa qulakkeerumallugu.
Ullumikkut sanaartorneq ingerlarsorpoq aningaasaliisoqarnissaanullu periarfissat naatsorsuutigisamit allanngorsimallutik. Maanna piffissanngorpoq inissialiornermik sanaartornermillu suliassaqarfimmi ersarinnerusumik pisariinnerusumillu siunissami pingaarutilimmik aalajangiinissamut, aningaasaliisoqarnissaalu qulakkeerumallugu.
Taamaattumik siunnersuutigissavarput kommunalbestyrelsip ataatsimiinnissaanut NCD Iserit-mut kattutsinneqarnissaa, sanaartorneq sanaartugassatullu suliniutit kommunimit ingerlanneqalernissaat ilanngullugu. Tassa imaappoq NCD-p inissiaatai Iserit-imut, atuarfinnik aamma meeqqerivinnik sanaartornerit kommunimit namminermit ingerlanneqassapput.
Taamaaliornikkut kommunitsinni aningaasat qanoq atorneqarnersut tamakkiisumik ersarissuunissaat qulakkiissavarput. Peqatigitillugu ersarinnerulissaaq NCD pinnani, kommunili nammineq aningaasanik attartorluni aaqqiissuteqarpat akikinnerulissaaq pisariinnerulerlunilu. Minnerunngitsumik ineqarnerup tungaatigut pitsanngorsaassaagut, aningaasartuutikillisaanikkut kiisalu inissiaatileqatigiiffik nukittorsagaq qajannaannerusoq, kommunip innuttaasuinut inissiassaqartitsisoq qulakkeerneratigut.
Taamaaliornikkut aningaasanik sipaaruteqassaagut atugarissaarnermut atugassanik, siulersuisut pisortallu akissarsiaat naleqartut ikinnerulissapput, aammalu tamat oqartussaaqataanerat ersarinnerutissavarput, sanaartornermik suliassaqarfik tigoqqikkutsigu. Siunissami sanaartornermik pilersaarutit kommunalbestyrelsip missingersuutaatigut isumaqatigiissutigineqartassapput taamaalilluni innuttaasunit tamanit takuneqarsinnaassaaq aningaasat sumut atorneqartarnersut. Isumaqarpunga tamanna pingaartuusoq.
Taamatut aaqqiissuteqarutta akileraarutinit isertitat sipaagaqarfigissavagut aammalu tamat oqartussaaqataanerat eqqarsaatigalugu ersarinnerulersitsilluta.
Uani suliami ilaasa inupiluuserniartutut isigivaannga. Isumaqarpunga taamatut iliuuseqarneq ullut tamaasa ilungersorlunga sakkortuumik sulillunga qularnaatsumik ingerlariaqqinnissatsinnut takussutissaasoq.