Services

Sermersuumi sulisoq Ukrainemi toqukkut qimaguppoq

Kommuneqarfik Sermersuup Aningaasaqanermut immikkoortortaani controlleri, Ivan Dumanov Ukrainemi toqutaavoq, russit Ukrainemut sorsuttut akiorniartillugit toquvoq. Sakkutooqataasa tamanna Ivanip angajoqqaavinut nalunaarutigaat. Ivan 30-nik ukioqarluni qimaguppoq.

Russit qeqertaasami Krimimi tiguaammata Ivan Dumanov Qallunaat Nunaannut qimaasimavoq. 2019-imilu qimaasutut akuerisaalluni inissisimalerami Kalaallit Nunaanukarnissi kissaatigisimavaa. Taamaasilluni siullersaalluni ullorlu manna tikillugu kisiartaalluni Kalaallit Nunaannut qiimaasuusimalluni. Aningaaserinermik ilinniakkani aallaavigalugu ullut amerlanngitsut iluani Kommuneqarfik Sermersuumi atorfinippoq. Ivan suliaminut pikkorissuuvoq immikkoortortaqarfimmilu suleqatiminit nuannarineqalipallalluni.

“Ivan suleqatigisimasanni ilakkuminarnerpaanut akuuvoq. Ilinniarluarsimasuullunilu poqersuuvoq. Sukkasuumik danskisut ilikkapallappoq, aamma kalaallisut ilikkagaqapallalluni”, ningiuata Dorthe Olsen Rasmussenip oqaluttuaraa.

Ivan akulerulluarnera sulifimmi kisimi pinngilaq. Kalaallit Nunaat aamma nuannarilluinnarpaa.

“Kalaallit Nunaat pinngortitarsuarlu nuannarilluinnarpaa. Umiatsiaaraateqarami angalaallattaajuartarpoq. Aamma katersuulluni naapeqatigiittarnerit nuannarai. Peqannginnerani oqaloqatigigaangakku Kalaallit Nunaanukaqqinnissani qilanaaralugu oqaatigiuartarpaa”, Dorthe Olsen Rasmussenip oqaluttuarpoq.

Naak Ivanip inuunera Ukrainemi uloriarnartorsioraluartoq, Ivan nuna inunngorfigisimasani ilaquttanilu illersorniarlugit aalajangerpoq. Ukrainemut aallarniassagami sulinngiffeqarnissani qinnutigisimavaa.

Ivan Dumanov, pingasunngornermi maajip sisamaani qimagutinnginnermi qaammatit marluk tikillugit Ukrainemi nunani ilaquttanilu illersorpai. Ivanip aappani Kalaallit Nunaaniittoq toqukkut qimappaa.