Services

Nuummi qatserisartut biilii tamarmik takusinnaavatit

Ataasinngorpat unnukkut Nuummi qatserisartut biilii siuleriaallutik paapoortut takuneqarsinnaajumaarput, ernumassutissaqanngilatilli. Nuummi qatserisartunut ulloq nuannersuusussaavoq, tassami taakku qatserisartoqarfimmut nutaarsuarmut nutsissagamik. Upalungaarsimanermut pisortap tullersortaa naapertorlugu qatserisartut pilerusuttupilussuupput.

Ataasinngorpat nalunaaqutaq 20.00-ip missaani Nuummi qatserisartut biilii paapoortut takussaajumaarput. Qatserisartut qatserisartoqarfittaarnertik malunnartinniarlugu, nutsernerminni biilitik tamaasa paapoortiutigalugit Pukuffimmukaatissavaat.

Ingerlaarfissaq qatserisartoqarfitoqqamiit aallartissaaq, illoqarfiup qeqqatigut Aqqusinersuaq aqqusaariarlugu H.J. Rinkip Aqqutaatigoorlutik ikkuallaaviup eqqaanut qatserisartoqarfittaaliassapput.

“Ulloq pisussaq ukiorpaalunni utaqqisimavarput, taamaammat qatserisartut pilerusulluinnarput” upalungaarsimanermut pisortap tullersortaa Jens Mikkelsen taama oqarpoq.