Attaveqaatit angallannerlu Business Services

Mittarfittaassaq pillugu naapinneq oqaloqatigiinnertalik: Takornariaqarneq sammillugu

Mittarfittaassap ammaanersiornissaanut assigiinngitsunik suliallit oqaloqatigiinnertalimmik naapinneranni takornariaqarneq qitiutilluinnarlugu suliaminnik ilisarititsipput, innuttaasullu takkuttut neriuutitik, annilaanngatigisatik ilimagisinnaasatillu saqqummiuppaat.

Mittarfittaassaq pillugu oqaloqatigiinnertalimmik naapinnermut qaaqqusisuupput Kommuneqarfik Sermersooq suleqatigalugu Naalakkersuisut Siulittaasoqarfiat, 50 sinnerlugillu peqataasoqarmat Hotel Hans Egede ataatsimiittarfiani takkussimasut tikilluaqquneqarmata issiaviit tamangajammik ulikkaarput.

Visit Greenland, Sermersooq Business aamma Air Greenland periarfissanik eqqartuipput
Aporfiusinnaasut pinnagit periarfissalli pillugit, suliaqartartut pingasut suliniutiminnik saqqummiipput, taakkulu mittarfittaassaq piareerpat takornariat amerlanerusut tikittalernissaannut Nuuk piareersimanissaa qulakkiissavaat.

Sermersooq Business-imit suliniummik aqutsisup Sara Nissen-ip suliniut Finding Nuuk nittarsaateqqinnera saqqummiuppaa. Nuuk qitiusumik oqaluttuassartaa pillugu takornarianut ornitassaqqissutut saqqummiunnissaa siunertaavoq. Suliniut tusagassiuutini assigiinngitsuni ataavartumik takuneqarsinnaassaaq aammalu kommunip nittartagaani inuillu attaveqaataanni, innuttaasullu tamarmik isummaminnik tunniussiffiginissaanut periarfissaqarumaarpoq.

Air Greenland-ip Attaveqarnermut Tuniniaasua Katja Vahl mittarfittaassaq aqqutigalugu siunissami takornariaqarnermi piujuartitsineq qitiutillugu saqqummiussivoq, ikummatissaq Sustainable Aviation Fuel atorneqartussaavoq taannalu mingutsitsisuunnginneruvoq. Peqatigitillugu Katja Air Greenland-ip siunniussatut atsiugaa, timmisartunik minnerusunik arlalinnik innaallagiatortunillu pisinissaa eqqartorpaa.

Visit Greenland-imit Anne Nivíka Grødem maannakkut siunissamilu takornariat Nuummut tikittartut kikkuuneri pisariaqartissinnaasaallu suussusersiniarlugit suliarujussuusartoq, siunissamilu takornariartitsisarneq pillugu suut iluatsissinnaanissaat pillugu paasiniaanermik suliaqartarnertik oqaluttuaraa.

Peqatigitillugu Naalakkersuisoqarfimmit siulittaasoq paasissutissanik katersineq qitiutillugu saqqummiisarpoq, tamanna kommuninik, Nunatta Naatsorsueqqissaartarfianik aamma Visit Greenland-imik suleqateqarnikkut pisarpoq. Siunertaavoq innuttaasunut inuussutissarsiortunullu paasissutissat tigussaasut siumullu ilisimariigassanik aallaaveqartumik tunniussinissaq, tamannalu paasissutissaasivikkut takuneqariaannaajumaarpoq, taanna  siunissami qaninnerpaami piareeriarpat.

Innuttaasut pimoorussilluarput
Oqaloqatigiinnertalimmik ataatsimiinnermi naggataagut apeqquteqartoqarsinnaallunilu oqaaseqartoqarsinnaavoq, tamannalu innuttaasunit atorluarneqarpoq.  Ilaatigut pineqarput:

  • Siunissami billettit pisiareriaannaanissaat, qanoq isilluni takornariat aggerfimminnit Nuummut angalaniarunik pisariitsumik pisisinnaanissaat qularnaarniarlugu, tamannalu Air Greenland-imit suliarineqalereerpoq.
  • Mittarfittaassat timmisartorsuarnik angisuunik ilaasorpassuaqarlutik tikittalernissaat pitsaasuunersoq imaluunniit pitsaanngilluinnartuunersoq. Tassunga uiggiullugu eqqartorneqarpoq illoqarfimmi takornariarpassuaqalernissaa ilumut kissaatigineqarnersoq.
  • Mittarfittaassamut tunngatillugu Nuummi eqqaanilu atassuteqaatinik pitsanngorsaanissaq piareersaanissarlu pillugit Namminersorlutik Oqartussat aamma Kommuneqarfik Sermersooq qanimut suleqatigiittariaqartut
  • Takornariat ilimagineqartumik amerlasuut tikittalernissaat eqqarsaatigalugu sumiiffimmi illoqarfimmilu pinngortitami avatangiisip piaarinaatsoornikkut aserortinnginnissaa qularnaarumallugu arlalitsigut iliuuseqartoqalereerpoq.

Innuttaasut ilaannittaaq mittarfittaassap sumiinnissaa takissusissaalu inaarutaasumik aalajangiunneqarmat naammaginninnginnertik oqaatigissallugu periarfissinneqarput, siunnersuuteqarfiusut oqaluttuarisaanermi pingaaruteqartut pinnagit aalajangiunneqarsimammat. Tamannali oqallisigineqarpallaanngilaq, siunissamili takornariaqarnermik inuussutissarsiutitigut periarfissat pillugit oqallinnermi oqaaseqartunit amerlanerpaanit sammineqarpoq.