Services

Kommunimi attartortunut inissatigut toqqissisimaneq

Charlotte Ludvigsen, Borgmesteri

Angerlarsimaffiup tungaatigut toqqissisimaneq ilaqutariittut pitsaasumik inuuneqarnissamut tunngaviit ilagaat.  Taamaattumik attartortut inissiani kommunip ingerlatseqatigiiffiinit pigineqartuni najugaqartut toqqissisimanissaat politikkikkut qulakkiissavarput Taamaattumik assut nuannaarutigaara ataatsimiinnermi kingullermi inissiaqarnerup tungaatigut toqqissisimanerup matuma qulakkeernissaanut pilersaarusiarput kommunalbestyrelsip tapersersormagu. 

Ineqarnermut tunngasutigut torersaanermut atatillugu, innuttaasut ineqarfii massakkut ullunik atorunnaarfissanik killiliussalinnik attartornermut isumaqatigiissutitallit, siunissamut ungasinnerusumut pilersaarusiuunneqarnissaat pisariaqarpoq. Erseqqissassavara attartornermut isumaqatigiissutit pineqartut ukiuni tulliuttuni atorunnaartussaanngimmata, kisianni massakkumiit angerlarsimaffinnik taakkuninnga siunissami qulakkeerinnittussanik pilersaarusiornissap qulakkeerneqarnissaa assut pingaartikkatsigu. Kommunimi qinersinernit politikkikkullu anguniakkanit siunissami sunniuteqarnerusussamik pilersaaruteqassaagut.  Tamanna innuttaasunut toqqissisimatitsinissamut aqqutissatuaavoq.

Tamanna periusissiatigut assigiinngissutigut innuttaasut nammineq nuukkumatinnagit nuutsitaannginnissaannik qulakkeerisussatigut angussavarput. Taamaattumik pisinnaasut assigiinngitsut sulissutigaagut Siunissaq eqqoqqinnaartumik naatsorsorsinnaanngilarput, missiliorsinnaavugulli kiisalu siunissami pisinnaasunut assigiinngitsunut pitsaanerpaamik aaqqiissuteqarnissamut assigiinngitsunik eqaatsunik pilersaarusiorsinnaalluta. Taamaattumik kommunimi pisiortornermik, piginneqatigiillutik inissiaatilinnik pilersitsinernik, kissaatigisamik nuukkusunnernik soorunamilu aalajaatsumik aningaasaleeriaaseqarnissamik sulissuteqarpugut.

Nuannaarutigaara tulluusimaarutigalugulu, suliassaqarfiup tamatuma pitsaanerusumik aqunneqarnissaanik sulissuteqaratta.  Allaffeqarfiup toqqissisimanissap qulakkeerneqarnissaa tamaviaarullugu sulissutigaa, kiisalu Nuup Sermersuullu sinnerata najugaqarfissatut pitsaasuunissaa qulakkeerumallugu pilersaarutit arlallit pingaarutillit akuersissutiginissaat sulissutigaarput.