Atuarfiup siulersuisuini siulittaasup Gerda Mikaelsenip Tasiilami atuartitsivik nutaaq qangali utaqqisaasoq atoqqaartippaa. Atuartut tassani digitalimi piginnaanngorsartassapput.
Atuartitsivik ipads atorlugu atuartitsinermi atuartunut ilinniartitsisunullu isumassarsiorfiussaaq, atuartullu digitali atorlugu pitsaanerusunik atortoqarnissaannut qulakkeerinninnissamut ilaassalluni.
Atuartitsivik taamaalilluni atuarfimmut, illoqarfimmut minnerunngitsumillu atuartunut pissarsiaavoq annertooq. Atuarfimmi atuartunik pissanganarnerusumik tamatigoornerusumillu atuartitsinissamut inissaqarnerulersitseqataassaaq kiisalu atuartitsinermi ipads atornerulerneqarnissaanik kommunip tungaaniit kissaataasup malinneqarnissaanut periarfissagissaarnerulersitsilluni. Taakku saniatigut atuartitsivik aamma ullaakkut katersuuttarfittut inaarutaasumillu misilitsittarfittullu atorneqarsinnaassaaq. Aammattaaq pikkorissartut, unnukkut filmertitsinermi allatulluunniit aaqqissuussinermi ini atortorissaarutillu atorneqarsinnaassapput.
Ini taanna siornatigut illoqarfimmiunut atuakkanik atorniartarfiunikuuvoq, maannali atuarfimmi inimut allamut nuunneqarnikuulluni.
