Illoqarfiup katersortarfiani Taqqissuummi innuttaasunik ataatsimiititsinermi oqallinnerit uummaarissut ingerlanneqarput. Ataatsimiititami ilaasortat aamma Inuussutissarsiorneq pillugu Siunnersuisooqatigiit assigiinngitsunik illoqarfimmi innuttaasut peqatigalugit oqallinnissaminnut periarfissinneqarput.
Borgmesteri Charlotte Ludvigsen innuttaasunik ataatsimiititsinermik ammaavoq, tassanilu ataatsimiititamit suliniutigineqartut, suliassat aallartinneqartut aamma siunissami suliniutissat ilisimatitsissutigivai. Kommunimit suliniutigineqartussat arlallit borgmesterimit saqqummiunneqarput, ukiuni aggersuni ilaatigut sanaartornermik pilersaarutit, materialgården/tigooraavimmik, qalulerivimmik aamma neqitsersuisarfimmik kiisalu illoqarfiup ikaartarfianik ilisimaneqartumik aallarniuteqartussat pillugit.
Innuttaasut ataatsimiitinneqarnerisa nalaanni inissiat ullutsinnut naleqquttut amigaataanerat arlaleriarlugu taaneqartarpoq. Inuussutissarsiutinik ingerlataqartut aamma innuttaasut isumaqarput inissiat pitsaasut iloqarfiup ajornartorsiutaanik aaqqiissutaasinnaasut. Inuusuttut amerlasuut inissaaleqisuusut oqaatigineqarami, amerlasuullu isumaqarlutik Paamiuni inissiat nutaanngitsut angivallaanngikkunik ullutsinnut naleqqukkunnaarsimasut.
”Illoqarfitsinni inissiat pillugit ajornartorsiuteqarluta ilisimavarput, taamaattumik nuannaarutigivara kommunalbestyrelsimi partiit tamarmik maani Paamiuni aamma Tunumi ukiuni aggersuni 10-ni inissianik amerlanerusunik sanaartornissaq isumaqataaffigimmassuk” Charlotte Ludvigsen oqarpoq.
Paamiut qanittuani umimmaat
Paamiuni Inuussutissarsiorneq pillugu Siunnersuisooqatigiit suliniuteqarnerisigut maannakkut Arsummiit Ittoqqortoormiiniillu umimmannik Paamiut kujataani qeqertaasamut nunniussinissamik aallartitsisoqarpoq. Ungasinnerusoq isigalugu piujuartitsisumik tammajuitsussarsiniartitsisoqartarnissaa aamma inuussutissarsiutigalugu piniartoqartarnissaa naatsorsuutigineqarpoq. Immikkoortuata siullia, ukiumi pissutsinik misissuinerusoq, apriilimi aallartinneqassaaq. Tassani Sermersooq Business aamma ataqatigiissaarisuussaaq suliniutigineqartorlu pillugu innuttaasunik ataatsimiititsisoqassaaq. Pilersaarutit malillugit misissuinerit aamma piareersarnerit pissappata, tassani naatsorsuutigineqarpoq umimmaat 2023-p qiteqqunnerani Paamiunut pissunneqarnissaat.
Sermersooq Business aamma atorfinnik marlunnik kattutsitanik pilersitsivoq, taanna Paamiut Katersugaasiviani piffissap affaani sulisassaaq, peqatigitillugulu Sermersooq Business-ip sulisorisassavaa inuussutissarsiornermik siunnersuisooqatigiinnik suliaqartassaaq suliassat allat attuumassutillit pillugit tamannalu Nuummi immikkoortoqarfik qanimut oqaloqatigalugu ingerlanneqassaaq.
Innuttaasunik ataatsimiisitsineq pissarsiaqarfiulluartoq
Ataatsimiititamit aamma inuussutissarsiorneq pillugu siunnersuisooqatigiinnit ilisimatitsissuteqartoqareermat innuttaasut eqimattanut sisamanut agguataarneqarput:
- Aallarnisaasuuneq
- Aalisarneq, piniarneq nunalerinerlu
- Sulisussat
- Ilinniagaqarneq
Innuttaasut uummaarissumik nerrivinni oqallipput, eqimattallu oqallisereermata qulequttat arlallit saqqummiunneqarput, assersuutigalugu pikkorissarnissamut pitsaanerusumik periarfissaqarnissaq kiisalu najugaq aamma illoqarfigisaq qimannagu ilinniagaqarsinnaanermut periarfissat aammalu illuaqqat amerlanerusut piniartunit sila ajortillugu atorneqarsinnaasut. Qulequtaq sakkortuumik eqqartorneqartoq tassaavoq takornariaqarnermik inuussutissarsiuteqarnerup iluani periarfissagissaarnissaq, tassani ilaatigut illuaraliortoqarsinnaanera pineqarpoq takornariat imaatigut angallanneqanngikkaluarlutik tikissinnaasaat.
Peqataasunut ilaavoq Tom Nykjær Schmidt:
”Pitsaasuuvoq politikerinik oqaloqateqarsinnaaneq. Eqimattani assigiinngitsuni qulequttat oqallisigineqartut innuttaasunut tamanut pingaaruteqartuupput. Pitsaassagaluaqaaq ataatsimiinnerit imatut ittut amerlanerugaluarpata, taamaattumik tullissaanut qilanaalereerpunga”, Tom Nykjær Schmidt oqarpoq.
Borgmesteri Charlotte Ludvigsen ataatsimiinnermik naggasiivoq:
”Nuanneqaaq ilissi innuttaasusi qanimut naapillusi aamma oqariartuutisi isumassarsiasilu tusaallugit. Pitsaanerpaajuaannarpoq innuttaasut qanimut naapinnissaat pappialatigut atuaannarnagit. Eqimattanit saqqummiunneqartut angerlaatissavagut nalilersussavagullu qanoq iliorluta pitsaanerulersitsissinnaanerluta. Oqariartuutissinnut qujavugut”, Charlotte Ludvigsen naggasiilluni oqarpoq.
Innuttaasunik ataatsimiititsinerup aallartinnginnerani illoqarfiup atuarfiata ammarneqarneraniit ukiuni 50-nngortorsiorneqarnera nalliuttorsiutigineqarpoq, Atuarfik Tuiisami atuartut atuarfitsik ukiut 50-it matuma siornatigut ammarneqartoq pillugu nipilersormata.
