Services

Oqartussaaffeqarfik sulisut amerlassusiinik qaffaavoq

Nalunaarutiginnittarnerit amerligaluttuinnartut isumagisinnaajumallugit Meeqqanut Ilaqutariinnullu Ingerlatsiviup kissaatigaa, taakkununnga tunngasuni suleqatigiinni aqutsisoqalissasoq. Kommunalbestyrelse atorfinitsitsinissamut missingersuutitigut qulakkeerinninnikuuvoq.

Nalunaarutiginninnerit 2020-mi 2.000-it sinneqarnerisa siornalu 2.400-nit amerlanerunerisa qularutissaanngitsumik takutippaa, amerligaluttuinnartut. Taamaattumik nalunaarutiginnittarfimmi suliassatigut artukkerneqarnermi suleqataasinnaasumik suleqatigiinni aqutsisumik atorfinitsitsisoqarnissaanut aningaasaliisoqassasoq aalajangerneqarpoq.

”Isumaginninnerup iluani suliat pilertortumik suliarineqartarnissaat qularnaarneqassaaq, piffissaagallartillugu tamakku isumagineqartaqqullugit. Suliat meeqqanut inuusuttunullu tunngasut sulianut allanut sanilliullugit pingaarnersiorneqassapput. Aammattaaq kommunip iluani aamma kommuninik allanik suleqateqarnermi suliat naammassiuminarsarneqarnissai qulakkeerneqassapput. Taamaaliornikkut suliap puigunnginnissaa aamma innuttaasup puigorneqartutut misiginnginnissaa imaluunniit suliap ingerlanerani sumiginnarneqannginnissaa qulakkeerneqassaaq. Saniatigut qularnaarniarparput suliat aaqqissugaanerup iluani tammartannginnissaat. Innuttaasut kommunitsinnut saaffiginninnertik isumannaatsutut toqqissisimanartutullu misigisassavaat”, borgmester Charlotte Ludvigsen oqarpoq, politikkikkullu tapersersorneqarnerminik naammagisimaarinnilluni.

Nalunaarutiginnittarfimmi suleqatigiinni aqutsisoqarnikkut Kommuneqarfik Sermersuumiit neriuutigineqarpoq, nalunaarutiginninnerit amerlaqisut isumagineqarnerat suliamillu suliaqarnerup pitsaassusaa annertunerulissasut, illuatungeriinnut tamanut iluaqutaasumik.