Services

Kommuneqarfik Sermersuumi sammisassanut karsit tassaassapput meeqqat pinnguaatigisinnaasaat aalanertallit

Kommuneqarfik Sermersooq aamma Kalaallit Nunaanni Timersoqatigiit Kattuffiat, Nunafonden, Arctic Sport aamma Blue Water Greenland ataatsimoorlutik sammisassanut karsit kommunimi meeqqerivinnut nassiussuunniarpaat. Karsit isumassarsiorfissanik aamma pinnguaatinut nuannersunut atortunik, meeqqat aalanissaannut atorneqarsinnaasunik, ulikkaarput.

Ulluunerani paaqqinnittarfinni timimik atuinerup misissuiffigineqarneratigut, ilaatigut Kommuneqarfik Sermersuumi, takuneqarsinnaavoq, sulisut quliugaangata taakkunannga qulingiluat naliliisartut ulluunerani meeqqat ulluinnarni timiminnik atuinerunissaat ilaasariaqartoq. 46 %-it isumaqarput atortussat amerlanerusut amigaataasut, 28 %-it isumaqartut isumassarsiorfissanik amigaateqartoqartoq. Taamaattumik 2022-p qiteqqunnerani suliniut nutaaq siammarterneqassaaq tassani isumassarsiorneq pinnguarnermullu atortut siammarterneqassammata.

Karsi ataaseq atortussanik, qulequttamut tulluartunik, aamma sammisassanut kortinik imaqarpoq. Paaqqinnittarfiit immikkut karsinik tallimanik tunineqassapput, tassanilu isumaavoq poortukkat tulleriiaarlugit ammarneqartarnissaat meeqqat assigiinngiiaartunik pissarsinissaat anguniarlugu. Karsit taakku tallimat imaattunik qulequtaqassapput:

  • Inuit pinnguaataat
  • Apummi aalaneq apuserinerlu
  • Meeraaqqerivik / maluginiutinut poortugaq
  • Nerrivimmi arsaararneq
  • Arsamik pinnguarnerit

”GIF-ip Kalaallit Nunaata nunarsuarmi timimik aalanerpaaffinngornissaanik anguniagaa kommunimit tapersersorneqarpoq. Taamaattumik sammisassanut karsit suliniutitsialattut isumaqarfigivarput, taakku meeqqat mikineriniit timimik aalatitsinissamut sungiusaataassammata. Meeqqanillu peqqinnerusunik nuannaarnerusunillu kinguneqartitsissapput”, Juaaka Lyberth, Meeqqaanut Atuarfeqarnermullu Ataatsimiititami siulittaasoq oqarpoq.

Sammisassanut karsit ajornanngitsunnguanngorlugit suliaapput, naatsuinnarmik ilitsersuineq taamaallaat pisariaqarpoq, inersimasorlu kinaluunniit meeqqanik taakku atorlugit pinnguartitsisinnaavoq.

Kommunip aamma timersoqatigiit kattuffiata saniatigut Arctic Sport, Nunafonden aamma Blue Water Greenland suliniummik tapersersuisuupput.

”Tamatuma assigiinngitsunit suleqatigiissutigineqarneratigut suliniut nukittuunngortinneqarpoq. Qujamasuutigivarput Nunafonden suliniummik tapersersuerusussimammat. Taamatuttaaq Arctic Sportip peqataanera assorsuaq nuannaarutigivarput, meeqqat taamaalillutik timersornermik aamma kulturikkut sammisassanik ilaatigut soorlu inuit games siusissukkut ilisimalissammatigit. Tamatuma saniatigut poortukkani ilaatinneqartut tassaapput timersuutit sunngiffimmi aamma sammineqarsinnaasut. Meeqqerivimmiit atuarfimmut ikaarsaarnermi sunngiffimmilu aalaneq, taakkuupput ataatsimut nukittorsaaffigerusullugit isigisavut,” Bjørn Søvsø Jensen, Kalaallit Nunaanni Timersoqatigiit Kattuffianni suliniutinut akisussaasoq, oqarpoq.

Karsit kommunimi meeqqerivinnit 2022-p qiteqqunnerani tiguneqarnissaat naatsorsuutigineqarpoq. Tamatuma kingornatigut suliniut nunamut tamarmut siammarterneqarsinnaavoq.

Annertunerusumik paasisaqarusukkuit una attavigiuk:

Kommuneqarfik Sermersuumi suliniummut akisussaasoq: Jane Nørgaard Gai uunga: jngi@sermersooq.gl imaluunniit 367302

GIF-imi suliniummut akisussaasoq: Bjørn Søvsø Jensen: bjoern@gif.gl imaluunniit 348160