Kommuneqarfik Sermersuup kultureqarnermut immikkoortortaqarfiata aammaarluni Apummik Ilusilersuineq ingerlatseqqissavaa. Ukiormanna Apummik Ilusilersuineq ingerlanneqassaaq 3. – 6. marts. Pikialaartitsineq sivisuumik uninngatinneqareerluni massakkut sisamassaat ingerlanneqalerpoq. Pikialaartitsineq ukioq kingullertut Nuutoqqami ingerlanneqassaaq tamanullu ammasuussalluni akeqaranilu.
Kulturikkut sammisassat amerlanerulerput
Ukiormanna pilersaarut allineqassaaq pikialaartitsinerit misigisassallu amerlanerussallutik apummik ilusilersuinerit saniatigut. Ilaatigut Nuummi Najukkami Ataatsimiititaliamit taperserneqartumik KODA awardimi nersornaammut innersuunneqartut Toornat, Andachan allallu tusarnaartitsissapput. Ilaqutariinnut meerartalinnut Hinnarik Kammanilu tusarnaartitsissapput aamma pikialaartitsivimmi meeqqanut assigiinngitsunik sammisassaqassaaq.
Ukiormanna Nuummi Apummik Ilusilersuinermi Alaskamiit tikeraartoqassaaq, Phillip aamma Tun’aqi Blanchett tikissammata pikialaartitsinermilu peqataasunut tusarnaartitsissallutik aamma inuusuttunut workshoppertitsissalluni. Suleqatigiinneq piviusunngorpoq U.S Embassy in Denmark tapersersuineratigut.
Pilersaarut tamarmi UANI takuneqarsinnaavoq.
Inuusuttut kommunimi tamarmeersut peqataassapput.
Ukiormanna pikialaartitsinermi inuusuttut Ittoqqortoormiineersut, Tasiilameersut Paamiuneersullu Nuummukarnissaannut unamminermilu peqataanissaat qitiutillugu Sermeq Puljemit tapersersorneqarput.
”Pilersaarutivut tamaasa Nuummi innuttaasunut saqqummiunnissaat assut qilanaaraarput. Pikialaartitsinermi ilusilersugassat kipparissut ukioq kingullermi arfineq pingasuusut 16-inngortinneqarput. Massakkut killilersuutit assigiinngitsut peerneqarput, taamaattumik ukiormanna pilersaarut pissanganartunik amerlasuunik imaqarluartipparput. Nammineerlunga apummik ilusilersukkanik assigiinngitsunik amerlasuunik takunissara qilanaaraara. Ukiut tamaasa isumassarsiullaqqissut suliaqartut isigalugit isumassarsiorfigisarpara” pikialaartitsinermi suliniummi aqutsisoq Maannguaq Rosing oqarpoq.
Unammineq tamarmi sapaammi marsip ulluisa arfernanni nal. 15 naammassineqassaaq, ajugaasut nalunaarutigineqarpata. Akissarsiassat annertupput tassa 10.000kr. Grønlandsbankimit, Nuuk Water Taximit angalaartinneqarneq, Vinslottet nereqatigiinnissamut inunnut sisamanut nereqatigiinnissaq imaluunniit Qiviumit qungasequtit kusanartut akissarsiarineqarsinnaapput.
Suliffeqarfiit allarpassuit suleqataasullu allat festivalernermi ikiuukkumasarput, ilaatigut aningaasaliisartoq pingaarneq Brugseni, festivalernermi nerisassanut aningaasaliivoq.
”Nuummi Apummik Ilusilersuineq piviusunngornavianngikkaluarpoq suleqatissarsiornermi piumassuseq ikiuerusussuserlu pigineqanngitsuuppata. Tamanna qujamasuutigeqaarput. Neriuppugut pikialaartitsinermi illoqarfimmi innutaasut amerlasuut takussallutigit.” pikialaartitsinermi suliniummut aqutsisoq Maannguaq Rosing oqarpoq.