Services

Nuuk piujuartitsiviusumik nutaaliornermi tikeraartitsisuussaaq

Aggustip naanerani nunanit issittuniittunit tamanit inuusuttut 200-t Nuummi katersuutissapput, nunarsuatsinni unammilligassat annersaanni unammilligassanut nutaaliorfiusumik aaqqiissutissanik nassaarnissaq ataatsimoorlutik anguniassallugu.

Nunani tamalaani kattuffik UNLEASH aalajangerpoq, ilaatigut Kommuneqarfik Sermersooq suleqatigalugu nunarsuup immikkoortuani Innovation Lab-ip siulliup kalaallit illoqarfiisa pingaarnersaanni ingerlanniarlugu.

UNLEASH-imiit inuusuttut piginnaanillit, qanoq iliorluni FN-ip piujuartitsiviusumik ineriartortitsinermi anguniagaasa 17-iusut anguneqarnissaannut nutaaliorfiusumik isumassarsiortut ikiorneqarnissaat aallunneqarpoq. Ilaatigut isumasioqatigiinnerit, Innovation Labs-inik taaneqartut arlallit aqqutigalugit inuusuttut isumassarsiaminnik ineriartortitsinissamut, aammalu suliffeqarfinnut aaqqissuussaanernullu, isumassarsiaminik siaruarterinerminni ikiortigisinnaasaminnut attaveqarnissaannut ikiorneqarsinnaapput.

UNLEASH siusinnerusukkut nunarsuarmi Innovation Labs-inut tallimanut tikeraartitsisuusarsimavoq, kisiannili Nuummi aaqqissuussinissaq nunarsuup immikkoortuanik, tassalu Issittumik aallussiffiusut siullersarissavaat.

Peqataasussat 18-it aamma 35-t akornanni ukioqassapput, aammalu aggustip ulluisa 20-anniit 27-annut isumassarsiaminnut ikiorneqassapput suleqatigineqassallutillu. Isumassarsiat pitsaanerpaat nersornaatisitinneqassapput, tamatumalu kingorna isumassarsisimasut isumassarsiaminnik siaruarterinissamut ikiorneqarnissamik neqeroorfigineqassapput.

Kommuneqarfik Sermersuup borgmesteriata Charlotte Ludvigsen-ip UNLEASH-ip nunarsuup immikkoortuani aaqqissuussinerup siuliup Nuummut inissinneqarnissaanik iluatsitsinera iluarisimaartorujussuuaa. Tassami nutaaliorneq aammalu FN-ip nunarsuarmi anguniagai tassarpiaapput Kommunip ineriartortitsinermut pilersaarutaanut pingaaruteqarluartut.

”Inuusuttut siunissaraagut. Kommunitsinni kinguaariinni tulliuttuni aallarniiniartut nutaaliortullu tapersersorneqarnissaannik aallussinissarput sulissutigaarput. Piujuartitsiviusumik nutaaliornerup iluani nikikkiartorneq takusinnaavara, isumaqarpungalu UNLEASH tamatumunnga nukittorsaaqataasinnaavoq. Illoqarfitta pingaarnersaanni alianaatsumi nutaaliornissamut pilersaarummi tikeraartitsisuunissarput tulluusimaarutigaarput, aammalu pilersaarutip inuiaqatigiinnut najukkatsinnut pitsaasunik naleqalersitsisinnaanissaannik qulakkeerinissarput UNLEASH suleqatigalugu anguniassavarput. Nammineerlunga nunanit avannarlernit issittuniittunillu tamanit inuusuttunik tikilluaqqusinissara, aammalu nutaaliorfiusumik piujuartitsiviusumillu suliniuteqarnermi neqeroorutigisinnaasatsinnik tamanik takutitsinissara qilanaaraara”, Charlotte Ludvigsen oqarpoq.

UNLEASH-ip siulersuisuini siulittaasup Flemming Besenbacher-ip aamma Nuup toqqarneqarnera nuannaarutigaa.

”Pingaartumik Innovation Lab-imut, nunarsuarmi nunat issittuniittut avannarliillu immikkoortuanni unammilligassanik aallutaqarfiusumut tikeraartitsisussaagatta nuannaarutigaara, aammalu Kalaallit Nunaata saniatigut allat pitsaanerusumik tikeraartitsisuunissaat takorloorsinnaanngilara. Qanittukkut Kalaallit Nunaannut tikeraarpunga, tassanilu kalaallit piginnaanilippassuit, siunissamut piujuartitsiviusumik nutaaliornissamik pingaartitsisut naapinnerat nuannaraara, UNLEASH-imut siulittaasoq Flemming Besenbacher oqarpoq.

UNLEASH Greenlandimi ammaanersiorneq naggataarnersiornerlu tamanut ammassaaq.