Business Politikki Services

Borgmester: Atuarfimmik matusinata allamik atuarfilioqqitta

Saviminilerinermut Ilinniarfiup nuunneqarnissaanut pilersaarutit qaqinneqaqqinnissaat pillugu nutaarsiassaq Kommuneqarfik Sermersuumi borgmesterimut annilaajallatsitsivoq. ”Sisimiuni ilinniarfiit ilaneqarnissaannik isumassarsiaq eqqarsaataavoq pitsaalluinnartoq, tamatumali Nuummi matusinissatsinnik kinguneqarnissaa isumatusaarnerunngilaq”, Charlotte Ludvigsen oqarpoq.

“Ukiorpassuarni assassornermik suliaqartut pikkorissut amigaataasimapput, aammalu inuusuttorpassuit ilinniagaqanngitsoortarput. Isumaga malillugu ilinniarfimmik nutaamik ammaanissaq, tamatumalu peqatigisaanik pigisatta pigiinnarnissaat naleqquttussaavoq”, nangippoq.

Tamatuma peqatigisaanik borgmesteri erseqqissaavoq, ilinniarfimmik nuussineq amerlanertigut aqukkuminaattartoq, akerlianilli nutaaq amerlanertigut iluatsitsiffiusarluni:

“Ilinniartitsisut taamatullu ilinniartut nooqataarusussanersut qulakkeersinnaanngilarput, tamannalu pissusissamisoorluinnarpoq. Tamatuma peqatigisaanik aamma Sisimiuni ilinniarfimmik taamaattumik peqarpat amerlanerusut ilinniarsinnaapput. Tassani ilinniarfimmik allamik ammaanissaq suliffissatsialannik amerlanerusunik pilersitsiffiussaaq sulisinnaasunillu peqarnissaq nukittorsaavigineqassalluni. Taamaattumik Sisimiuni ataatsimik ammaasa, maaniittorlu pigisarput pigiinnartigu.”

Assassorlutik sulisartut, soorlu mekanikerit qullilerisullu ukiorpassuarni amigaataasimapput, aammalu sanaartukkat angisuut amerlanersaanni avataaniit sulisussanik tikisitsisarput. Taamaattumik aamma Charlotte Ludvigsen isumaqarpoq, Kalaallit Nunaanni Saviminilerinermut Ilinniarfik ilaneqassappat tamanna aningaasaqarnikkut toqqaannartumik iluaqutaasinnaasoq.

”Oqarnittut assassorlutik sulisut nunatsinni maani amigaataanerat annertuvoq, aammalu Saviminilerinermut Ilinniarfimmi inuusuttunik, siunissami akissarsiagissaalertussanik ilinniartitsisarpoq. Taamaattumik ilinniarfinnik amerlanerusunik pilersitsisariaqaraluarpugut, taamaalillutalu inuusuttut sapinngisamik amerlasuut ilinniagarissaarnissamut periarfissillugit. Taamatuttaaq aamma akileraarutigut aningaasaanit, pisortat annertuunik aningaasaliisarnerannut atorneqartartunit amerlanerusut nunatsinniiginnartalissagaluarput. Taamaalilluta aningaasat assassorlutik sulisunit nunanit allaneersunit angerlaanneqaratik nunatta killeqarfiisa iluanni sulitissinnaalissagaluarpagut”, Sermersuup borgmesteria oqarpoq.

Aamma borgmesteri isumaqarpoq, sulisut ilinniartullu saniatigut inuussutissarsiutinik ingerlataqartut Saviminilerinermik Ilinniarfik nuussanersoq pillugu isummersoqataatinneqartariaqartut.

”Ilinniartitsinivut suliffissanik pitsaasunik pilersitsiffiussappata aammalu inuussutissarsiornermi ineriartortitseqataassappata, suliffeqarfiit sulisunik pisariaqartitsisut akuutinneqarnissaat pingaaruteqarpoq. Assassorlutik suliallit Nuummi amigaataanerpaasimappata, maani ilinniarfik matullugu Sisimiunut nuunneqarnissaa naapertuutinngitsutut isikkoqarpoq”, Charlotte Ludvigsen oqarpoq.