Services

Tunumi ajornartoornermi upalungaarsimasut

Tasiilaq aamma Sermiligaaq ulluni kingullerni marlussunni toqumik kinguneqartumik alianartunik nalaataqarfiupput. Tamanna tunngavigalugu sumiiffimmi upalungaarsimasuutitat sulisinneqalerput. 

Immikkoortumi pisortaq Hjørdis Viberg oqaluttuarpoq, nammineq allatuulli Tasiilap eqqaani pisimasunut attortisimaqaluni, nassuiaatigalugulu kommunip tungaaniit iliuuseqarfigisassat suut aallaartinneqarsimanersut: ”Piffissami kingullermi alianartunik pisimasoqarnera pissutigalugu, maani ajornartoornermi upalungaarsimasuutitat suliassaat aallartinneqarput. Imaappoq, Sermiligaami Tasiilallu illoqarfiani ilaquttat qaniginerpaasat isumassorneqalerput.”

Tasiilap eqqaani nunaqarfinni tallimaasuni tamani ataavartunik ajornartoornermi upalungaarsimasoqarpoq, taakkualu maannakkut Tasiilamiit oqarasuaatikkut ikiorserneqarput. Sila pitsanngoriarpat, sulisut Tasiilameersut nunaqarfiliassapput, tarnip pissusiinik ilisimasalimmik angalaqateqarlutik. Tasiilami tarnip pissusiinik ilisimasallit marluk psykoterapeutilu ataaseq atorfeqarput, taakkualu tamarmik ajornartoortoqartillugu upalungaarsimasunut ilaapput, ilaqutaasunik allanillu pisimasumut nalaataqartunik ikiorneqarnissaminnik kissaateqartunik ikiuuttarlutik.

”Maanna ukiuni marlunngulersuni illoqarfitsinni ajornartoortoqartillugu upalungaarsimasartut inerisaaffigalugit sulissutigereersimalerparput, aammalu politiit, peqqinnissaqarfik, isumaginnittoqarfik, atuarfik illoqarfimmilu oqartussaqarfiit allat suleqatiginerat pitsanngorsaaffigisimallugu. Sumi ikiuisoqassanersoq ikorfartuisoqassanersorlu pillugit pitsaasumik oqaloqatigiittoqartarpoq, aammalu pissusissamisoorluinnartumik immitsinnut ikioqatigiittarpugut,” Hjørdis oqaluttuarpoq.

Atuarfimmi ajornartoornermi upalungaarsimasuutitat sulinerat aallartinneqarpoq, atuarfillu aamma atuarfimmi tarnip pissusiinik ilisimasalik suleqatigalugu alianartorsiortoqartillugu oqaloqatigiittartunik pilersitsisimavoq. Igdlo-mi Inuusuttut kulturikkut illorsuanni inersimasut inuusuttunik illoqarfimmeersunik arlaatigut attortisimasunik isumassuisarput.

Ajornartoortoqarnissaanut piareersimasut
Hjørdis´ip nassuiaatigaa, siorna coronamik ajornartoortoqarnerani upalungaarsimasuutitat tamaani upalungaarsimanermut tunngasunik paasititsiniaallutik ikiuulluarsimanerisigut, qanimut pitsaasumillu suleqatigiinnerup qanoq iluaqutaatigineranik nukittorsaaqataasimapput, imalu itisiliilluni: ”Imatut nalaataqartoqartillugu tamakkua iluaqutigisarpavut.  Taamatut sakkortutigisunik pisoqartillugu iluaqutaajuaannarpoq, kisiannili tamassuma qiterpiaa paasillugu pitsaasuuvoq, ullumikkut ikiorneqarnissaminnik pisariaqartitsisunut neqerooruteqarsinnaagatta. Taamaaliorsinnaasimanngilagut ukiut pingasut matuma siornagut.”

Najukkami iliuuseqarnerit tamaasa saniatigut, sapaatip akunnerata tulliani meeqqanik sullissisartut illoqarfimmut tikissapput, pilersaarutaasumik angalanissaq malillugu. Tarnip pissusiinik ilisimasallit marluk tikissapput, persuttaasoqarsimanerata ajornartoortoqarnerata kingunerisaanik oqaloqatiginninnermik, aammalu inuit ajornartoornermik nalaataqartut qanoq ikiorserneqartarnerannik misilittagaqartut.

Siunnersuisartut ilaat ataaseq Tasiilap ukiunut arfineq-pingasunut ineriartortitsinermut pilersaarutaanik suliaqartoq aamma tarnip pissusiinik ilisimasalittut ilinniarsimasuuvoq, aammalu ajornartoortoqarnerani oqaloqatiginninnermi suut atorneqassanersut pillugit immikkut ilisimasaqartuulluni. Siunnersorti taanna aamma sapaatip akunnerata tulliani illoqarfimmut tikissaaq.

”Ataatsimut isigalugu isumaqarpugut, ikiuinissatsinnut ikorfartuinissatsinnullu piareersimalluarluta. Kikkulluunniit atorfissaqartitsisut, ajornartoornermi ikiorneqarsinnaapput ikorfartorneqarlutillu, pisimasut sakkortuut inissaqartinniarlugit suliariniarlugillu. Taamaattoqarnera soorunami pinngitsoorneqarsimanissaat piumanerugaluaqaarput. Kisianni tassa taamatut pisoqarpoq, taava ataatsimoorussisariaqarpugut, ikioqatigiillutalu piffissaq ilungersunartoq anigorniartariaqarlugu,” Hjørdis Viberg naggasiivoq.