Piniarneq, Aalisarneq Nunalerinerlu Services

Tasiilami umiarsualivimmi pitsanngorsaanerit annertuut

Umiarsualiviup itisilerneqarnera, puttasut nutaat pingasut aamma umiatsianik inissiivissat arlallit Tasiilami piviusunngungajalerput. Pitsanngorsaatissat taakku tamarmik missingersuutitigut isumaqatigiissuteqartoqarneratigut kommunalbestyrelsip imarsiornermut tunngasunut salliunneqarnissaannik aalajangerneratigut piviusunngorsinnaanngulerput.

Tasiilaq sikueriarpat umiarsuarlu 2022-mi tikittussaq siulleq tikippat, ilaatigut tikittussani puttasut pingasut siulliit ilanngullugit tikiunneqassapput. Puttasut ilinniartut inaata avannaatungaanut immikkoortup ilaatut 30D11-tut taaneqartumut inissinneqassapput. Missingersuutitiguttaaq aamma nunagissaanissaq ikaartarfinnullu toqqavissaliornissaq aningaasaliiffigineqarput.

”Kommunerujussuatsinni imarsiorneq tamatsinnut pingaarutilerujussuuvoq. Taamaattumik pingaartilluinnarpara, Tasiilami umiarsualiveqarnerup pitsanngorsaavigineqarneranut peqataasinnaanerput”, borgmesteri Charlotte Ludvigsen oqarpoq.

Pitsanngorsaatissat arlallit suli piviusunngortinneqassapput
Umiarsualiviup ikkalivallaarnera ajornartorsiortitsingaatsiartarpoq. Umiarsualiviup iluatungaani itisilerisoqarneratigut umiatsiaaraatillit umiatsiami kommunip puttasuaniitinneqarnera ajoquserneqarnissaat ernumagisarunnaassavaat.

Umiatsianik inissiivissaaleqisarneq aamma iliuuseqarfiginiarlugu politikkerinit aalajangerneqarpoq.   Ilinniartut inissiaqarfiata avannaatungaani umiatsianut nutaamik inissiiviliortoqarnissaanut aningaasanik atugassanik pissarsisoqarpoq. Sumiiffik pisariaqartitsineq naapertorlugu piffissap ingerlanerani annertusarneqartassaaq.

Puttasut aamma sumiiffimmi tassaniissapput, taamaalillutik taakku imminnut qanittumiitinneqarlutik.

Ataatsimut isigalugu imarsiornermut tunngasut najukkami aalisartunut, piniartunut, takornarialerisartunut kiisalu innuttaasut umiatsiaaraatillit eqqarsaatigalugit pitsanngorsaanerit pissapput. Tamanna pillugu Tasiilami umiatsiaaraatillit umiatsiaaraateqalertussallu umiarsuup ukioq manna tikittussap siulliup tikinnissaanut qilanaarnissamut pissutissaqarluarput.