Kommuneqarfik Sermersooq immiisarfiit amerlanerulersinnerisigut ikummatissanik atuinerup annikinnerulersinnissaanut peqataarusuppoq. Missingersuutinut isumaqatigiissummi akuerisaaqqammersumi tallimanik immiisarfinnik pilersitsinissaq aningaasaliiffigineqarpoq, taakkulu immiisarfiit illoqarfimmi sumiiffinni assigiinngitsuni inissisimassapput.
Ukiuni makkunani biilinut immiisarfiit amerligaluttuinnarput, Kommuneqarfik Sermersuumiillu namminersortut pisortallu arlallit peqataammata nuannaarutigineqarpoq. Pingaartumik borgmesteri Charlotte Ludvigsen tamatumunnga naammagisimaarinnippoq.
Kommunimi qinikkat minguinnerusumik iliuuseqarnissamut peqataanissaq aalajangiuppaat, tassa Nuummi biilinut amerligaluttuinnartunut pigineqartunut tamanit atorneqarsinnaasunik immiisarfinnik nutaanik tallimanik pilersitsisoqarnissaa isumagalugu, tamannalu borgmesterip Charlotte Ludvigsenip nuannaarutigaa.
”Mingutsitsinnginnerusumik allannguineq inuiaqatigiinni eqqaaneqarsinnaasuni tamani sulissutigineqarpoq, taamaattumillu kommunip peqataaffigisinnaasamini peqataanissaa pingaaruteqarpoq – assersuutigalugu biilinut amerlanerusunik immiisarfilersuinikkut, taamaatilluta benzinamik atuineq annikinnerulersissagatsigu”, borgmesteri naammagisimaarinnilluni oqarpoq.
Kommune tapersersuisoralugu Nukissiorfinniit immiisarfiit, Brugsenip eqqaaniittussat kiisalu Naluttarfik Maliup eqqaaniittussat ingerlanneqassapput aserfallatsaaliorneqarlutillu.
Brugsenip eqqaani sukkasuumik immiisarfiit kiisalu nalinginnaasumik immiisarfik ataaseq pilersinneqassapput, sukkasuumillu immiisarfinni ataasiakkaani biilit sisamat ataatsikkut immiisinnaassapput. Sukkasuumik immiisarfiit decembarip ingerlanerani Danmarkimiit nassiunneqassapput.
Maliup eqqaani immiisarfiit nalinginnaasut marluk ikkunneqassapput, taakkunanilu biilit sisamat ataatsikkut immiisinnaassapput. Taakku immiisarfiit atorneqalereerput.