Ataasinngormat 10. januaarimi Corona pillugu tusagassiortunik katersortitsinermi Peqqissutsimut Naalakkersuisuugallartoq Mimi Karlsen oqarpoq, kommunit antigentest-inik 40.000-inik, akissaatikinnerusut kommunit allaffiinut aasinnaasaannik pissarsissasut.
Taamatut paasissutissiisoqarnera kommuninit tupaallaatigineqarpoq, siumoortumik taamatut isumaqatigiissuteqartoqarnera ilisimaneqanngimmat. Tusagassiortut katersortinneqarnerisa kingorna kommunit tallimaasut suliassaq tiguniarnagu aalajangerput. Ilaatigut kommunit innuttaasut akissaatikitsuunersut naliliiffiginissaannut inatsisitigut tunngavissaqanngimmata, tamannalu misissuutissanik innuttaasunut tunniussinissamut tunngavigineqartussaavoq.
Tamanna pissutigalugu misissuutinik akeqanngitsunik kommunit allaffiinut aallernissaq periarfissaanngilaq.
Kommunit tallimaasut misissuutinik 300.000-inik Namminersorlutik Oqartussaniit tunineqarnissamut neriorsorneqarput, misissuutilli taakku kommunit sullissiviini, soorlu paaqqinniffinni tuniluunnermik isitsaaliiniarluni sulisunit atorneqartussaapput.