Services

Inuusu Kombestimi ilaasortat saqquminerulerput

Kingullermik kommunalbestyrelse ataatsimiimmat oqaluuserisassani immikkoortoq 19 inuusuttut arlallit malinnaaffigilluarpaat. Tassaammammi Inuusu Kombestimi suliap inaarneqarnissaanut Kommunalbestyrelsip ataatsimiittarfiani taasissutigineqarfissaa. Ingerlalluarporlumi!

Ungaaq M. Jereniassen aamma Uiloq Christensen ASK-imi 8.b-mi atuartut Inuusu Kombestimi ilaasortat ilagaat, tassani Kommuneqarfik Sermersooq tamakkerlugu atuartut katersuuttarput qinikkanullu siunnersuusiorlutik.

“Matumani pineqarpoq meeqqat inuusuttullu tamat oqartussaaqataanerat naapertorlugu ilinniartinneqarnissaat, tulluusimaarutigaaralu Inuusu Kombestimut ilaasortat taamak piumassuseqartiginerat. Kisianni aamma siunnersuutaat, pitsaalluinnartut, nuannaarutigeqaakka. Uagut qinikkat meeqqanik inuusuttunillu tusaaniarnissarput iluaqutigissavarput, taakkuummata allatut isiginnittaasillit”, borgmesteri Charlotte Ludvigsen oqarpoq.

Siunnersuutit qinikkanit tapersersorneqarput

”Peqataalluni nuannernerpaavoq ataatsimiinnermi oqaloqatigiinneq, tunissutisineq nutaanillu kammattaarneq”, Ungaaq oqarpoq

Ataatsimiinnermilu oqaloqatigiinneq kinguneqarluarsimavoq, qinikkat inersimasut inuusuttut siunnersuutaat akuersissutigimmassuk. Siunnersuutit ilagaat atuarfiit assigiinngitsut akornanni kammagiinnerulernissamik suliniuteqarnissaq.

”Kammagiinnerulertoqassaaq, tamannalu atuartunut kiserliortunut iluaqutaassaaq”, Uiloq oqarpoq.

Maanna Inuusu Kombestimut ilaasortat suliassartik naammassereerpaat, tullinnguupput atorfilittat siunnersuutinik piviusunngortitsinisssaat, tamallu oqartussaaqataanerat malillugu ingerlariaaseq naapertorlugu naammassisaqarnissaq.