Services

Eqqaavilerisutut sulinermi atugassaritinneqartut pitsaanerusut

Sermersuumi Eqqagassaleriffik maannakkut innuttaasunit saaffiginneqartuartarpoq, eqqakkaminnik aallerfigineqarsimanngitsunit, eqqaavilerfiisa inissisimanerat pissutigalugu. Tassunga pissutaavoq eqqaavilerfinnik inissiinermi malittarisassat eqqagassat pillugit malittarisassat 2021-meersuni akuersissutigineqartut, 1.1. 2022 atuutilermata.


Inissisimaffiup allanngortinnissaanut piffissaqarluarpoq
Naak malittarisassat 2021-mi pigineqareeraluartut, kommunip toqqarsimavaa, 1.1.2022 nallertinnagu portusuumi inissiinermut tunngatillugu malittarisassat atuutissanngitsut (tummarfeqanngitsuni/majuartarfeqanngitsuni).

Taamaaliornikkut – pingaartumik Nuummi – ukiup ingerlanerani eqqaavilerfiit nutaamik inissisimaffeqalernissaannut periarfissiisoqassaaq, imaluunniit eqqagassanik akuerineqarlutik angallassisartut (Nuuk Transport imaluunniit Godthåbs ransportservice) isumaqatigiissuteqarfiginissaannut. 

Kommuneqarfik Sermersooq 2021-mi aasakkut arlaleriarluni aammalu ukiortaami ilaatigut kommunip nittartagaatigut, Eqqagassaleriffiup facebookikkut qupperneratigut aammalu kommunip facebookikkut qupperneratigut paasissutissiisarpoq.


Malittarisassani atuuttuni sulisilluni avatangiisimut iluaqutaassapput
Eqqaaveqarfinni inissiinissamut malittarisassat allannguuteqartinnerat pivoq, eqqaavilerisut sulinerminni atugarisaannik pitsanngorsaasoqarnissaa pissutigalugu. 

Kommunip eqqagassaleriffianit eqqaaveqarfiit inissisimaffiinut aallertarnermullu malittarisassat atuuttut tassaapput:  

  • Ullormi igitat aaneqarfissaanni kingusinnerpaamik nal. 7 eqqaaveqarfiup eqqaa aputaajarneqarsimassaaq.
  • Aqqut toqqissuussaaq aamma ukioq naallugu eqqaaveqarfiup tungaanut aqqusinermiit aqqutigineqarsinnaassaaq.
  • Eqqaaveqarfik sipporlugu ulikkaarneqassanngilaq aamma matua matuneqarsinnaassaaq.
  • Eqqaaveqarfik nunamit portunerusumut inissinneqassanngilaq – majuartarfeqassanngilaq.
  • Eqqaaveqarfik annerpaamik aqqusinermiit 50 meteritut ungasissusilimmut inissinneqarsimassaaq, ukiumi aasamilu.
  • Eqqaaveqarfik nivingassaaq/qullasitsinneqassaaq portunerpaaffik 40 cm-nik tikillugu, assersuutigalugu majuartarfiup saneraani.

Nalunaartussaatitaaneq akiliisussaatitaanerlu
Eqqagassat pillugit malittarisassani 2021-meersuni pisussaaffiit arlaqarput, eqqagassalerinermut tunngasuni innuttaasutut pisussaaffigineqartut. 

Taakkua ilagivaat nalunaartussaatitaaneq aammalu akiliisussaatitaaneq.

Nalunaartussaatitaaneq aammalu akiliisussaatitaaneq tassaapput, illit igitassaasiviit igikkiartortinneqarnissaannut nalunaartussaallutillu akiliuteqartussaatitaanerit. Nuummut tunngatillugu pisariaqavitsillugu, eqqagassanik aallertartumit namminersortumik aallertitsisoqartarpoq, eqqagassanik eqqagassanillu assingusunik angallassinissamut akuerisamik.  

Eqqagassanik angallassisartumit namminersortumit eqqagassanik igitsiartortitsineq
Kommunip eqqagassalerinermi aaqqissuussineranut peqataajumaguit, eqqagassanik angallassisartumit akuerisamit isumaqatigiissuteqarlutit aallertitsisinnaavutit, nalunaartussaatitaanermut akiliuteqartussaatitaanermullu pisussaaffik qulaani taaneqartoq naapertorlugu.

Angallassisartoq eqqagassanik angallassinissamut akuersissuteqassaaq.

Eqqagassanik igitsiartornissamut angallassisartoq namminersortoq toqqarneqarpat Sermersuumi Eqqagassaleriffiup qinnuteqartoqarnera malillugu piumasaqaatigissavaa, eqqagassanik igitsiartorneq, eqqagassat pillugit malittarisassat atuuttut naapertorlugit pissasoq. Tamanna pisinnaavoq assersuutigalugu eqqagassanik aallertartumut atsioqatigiissuteqarnikkut/isumaqatigiissuteqarnikkut. Taamatut pisinnaatitaaffeqarneq Eqqagassat pillugit malittarisassat 2021-meersuni paasissutissiisussaatitaanermut tunngasortaani allassimavoq. 

Eqqaaveqarfiit nuunneqassava?
Illit innuttaasut ilaattut eqqagassanik aallerfigitissimanngitsut ilagippatsit, eqqaaveqarfippit inissisimanissaanut malittarisassat malillugit inissisimannginnera pissutigalugu, taava illit nammineq toqqaannartumik ikuallaavimmut igitsiartornissat isumagissavat, malittarisassat malillugit eqqaaveqarfiup inissisimatilernissaata tungaanut. Malittarisassat malittarisassaniittut malinneqanngippata, eqqagassalerisup eqqaaveqarfiup imaarnissaa pisussaaffiginngilaa.

Eqqaaveqarfippit malittarisassat malillugit sumut inissinnissaa nalornissutigigukku, Sermersuumi Eqqagassaleriffik takusaasinnaavoq, inissiiffissamillu pitsaanerpaamik innersuussilluni.

Sermersuumi Eqqagassaleriffik uunga attaveqarfigineqarsinnaavoq affald@sermersooq.gl. Covid-19 aamma Sermersuumi Eqqagassaleriffimmi sulisutigut sunniuteqarnera pissutigalugu, saaffiginnissutit nalinginnaasumit sivisunerusumik suliarineqartarsinnaapput.

Malittarisassat malinneqarsinnaatinnagit, Sermersuumi Eqqagassaleriffiup innersuussutigaa, eqqaamioriit arlaqarlutik ataatsimoorussamik containeriliisinnaanissaat.