Services

Coronamik tuniluunneq: Atuarfinni meeqqerivinnilu suut iliuuserineqarpat?

Coronap tuniluunnerani qanorluunniit pisoqarsinnaammat Kommuneqarfik Sermersuumi atuarfiit meeqqeriviillu pissutsinik allanngortoqarnerata kingunerisaanik naleqqussarneq arlaleriarluni pisimavoq. Tamanna apeqquterpassuarnik pilersitsivoq, taamaariarmat Meeqqanut Atuarfeqarnermullu Ingerlatsivik apeqqutigineqarnerpaajusartunik katersisimavoq. Apeqqutit akissutaalu uani atuarsinnaavatit.

Meeraaqqeriviit meeqqeriviillu

– Kommunimi meeqqanik paaqqinniffinni assigiinngitsuni meeqqat/angajoqqaat sulisullu akornanni tuniluunnerujussuaq eqqarsaatigalugu corona pillugu upalungaarsimanermut pilersaarutinik nutarterisoqarnikuua?

Meeqqanut Atuarfeqarnermullu Ingerlatsivik Naalakkersuisunit najoqqutassanik nutaamik nalunaaruteqartoqartillugu upalungaarsimanermut pilersaarutinik naleqqussaaniartuaannarpoq. Ilaatigut meeqqerivinnut nassiunneqartumik allagartaliortoqarpoq, tassani paasissutissiissutigineqarlutik attaveqarfiusinnaasunut allanut tunngasut. Aamma angajoqqaatut sulisutullu iliuusissat allassimapput.

– Upalungaarsimanermut pilersaarutit/najoqqutassat nutaat meeqqerivinnut ataasiakkaanut taakkunanilu sulisunut kingornalu angajoqqaanut meeqqanullu qanoq anngunneqartarpat?

Upalungaarsimanermut pilersaarummik iluarsiissuteqartoqartillugu allaganngorlugu meeqqerivinnut nassiunneqartarput. Tamatumalu kingorna meeqqerivimmi pisortat isumagisarpaat, angajoqqaanut meeqqanullu paasissutissat pisariaqartut anngunneqarnissaat.

– Sulisut tuniluuttoqarneranut illersorniarlugit immikkut maleruagassaliortoqartarpa?

Eqqiluisaarluarnissamik ersiuteqarnerlunilu eqqumaffiginninnissamik sulisunut meeqqanullu akuttunngitsumik kaammattuuteqartoqartarpoq. Aammattaaq init akornanni tuniluunnit pitsaaliorniarlugu meeqqat sulisullu agguataarneqarnissaat kaammattuutigineqartarpoq. Nutaatut meeqqerivinnut tamanut sulisunut atugassanik antigentestinik nassiussisoqarnikuuvoq.

– Siusinnerusukkut paasissutissiissutigineqarnikuuvoq, sullitanik qanimut sullissisartut nualluummut nalinginnaasumut akiuussusersuisoqassasoq. Taamatullu meeqqat coronamut akiuussusertinnissamik neqeroorfigineqassapput. Suliniutit taakku malinnaaffigineqarpat, killiffik suua?

Sulisut tamarmik ilisimatinneqarnikuupput, kommunip akiligaanik nualluummut akiuussuserneqarsinnaallutik. Akiuussusertiinnariaapput aningaasartuutertillu utertillugu. Sulinerup avataani tamanna pinissaa innersuussutigineqarpoq, tamannali ajornassappat sulinerup nalaani pisinnaavoq – aqutsisorisarli isumaqatigineratigut tamanna pissaaq.

– Meeqqeriviit ataasiakkaat meeqqat sulisullu akornanni annertuumik tuniluuttoqalertillugu nammineq maleruagassaliorsinnaappat?

Naamik, meeqqeriviit akornanni maleruagassatigut assigiissaarinissaq pillugu pisortaq fagchefilu isumaqatigalugit pisussaavoq.

Meeqqat atuarfiat

– Angajoqqaat meeqqatik coronamik tunillatsinnginniassammata angerlarsimatiinnarpatigit, akuerisatut imaluunniit akuerisaanngitsutut nalunaarsorneqassava?

Meeqqat qanimut attaveqarsimanertik pissutigalugu angerlarsimatiinnarneqartut imaluunniit coronamik tunillatsissimasut, atuannginnerat akuerisatut nalunaarsorneqassaaq. Meeqqat tunillatsinnissaannik angajoqqaat annilaanganerat pissutigalugu angerlarsimatiinnarneqartut, akuerineqaratik  atuanngillat, tamanna pisortaniit innersuussutigineqanngimmat.

– Taamatut ’pinaveersaartitsilluni atuanngitsoornernut’ kommunip atuarfiini tamani assigiimmik malittarisassaqarpa, tunillatsinnissaq pinaveersaarniarlugu angajoqqaat meeqqaminnik angerlarsimatitsiinnartillugit? 

Aap, assigiipput.

– Ilinniartitsisut, ullut tamasa meeqqanik/inersimasunik amerlasuunik najuisut, coronamik tunillatsinnissaannut illersorniarlugit sunik maleruagassaqarpa? 

Tamanik eqqiaalluartarnissaq kaammattuutigineqartarpoq aammalu meeqqat ersiuteqarnersut maluginiaqquneqartarluni. Taava aamma ingerlatsivik atuarfinnut najoqqutassanik atuilersitsinikuuvoq, taakkunani klassit trinillu pisariaqanngitsumik akulerunneqassanngitsut, klassit akornanni tuniluutsitsisoqarnissaa pinaveersaarniarlugu. Tamanna maannakkut Nuummi taamaallaat atuuppoq, tuniluunnerup amerlanerpaaffigimmagu.

– Atuartut anginerit soraarummeertussanngortut coronamik ajornartoortinneqassappata ingerlatsiviup sunik kinguneqassangatippaa?

Maannakkuugallartoq naagga. Atuarfiit kaammattorneqarput atuartut soraarummeertussat ukkatareqqullugit qarasaasiakkullu atuartitseqqullugit, tamanna periarfissaagaangat, taamaalillutit atuartut angerlarsimasut malinnaasinnaaniassammata.  Aamma pisariaqarluinnarsinnaavoq qarasaasiakkut atuartitsisoqarnissaa, assersuutigalugu ilinniartitsoq angerlarsimaannaqqunearpat.

– Atuartut aasamut soraarummeernissaminnut pisariaqartitaminnik atuartinneqarnissartik pinngitsuussappassuk, ingerlatsiviup/atuarfiup maleruagassat suut pinngitsoortikkusuppai?

Tuniluunnersuaq qaangiuteriarpat, ingerlatsiviup malinnaaffigisinnaalissavai tiimit sorliit taamaatiinnarneqarsimanersut taavalu nalilersinnaalissallugu, kingusinnerusukkut atuartinneqarnissaat angumeriniarneqassanersoq.

– Paasitinneqareerpugut, ilinniartitsut amerlasuut, angerlarsimatiinnarneqartut, suli atuartuutiminnik Teamsikkut imaluunniit Zoomikkut atuartitsisartut. Aamma paasitinneqareerpugut, atuartut angerlarsimatiinnarneqartut – atuarfinni arlalinni – aamma klassimi atuartitsinermi peqataanissaminnut videokkut malinnaasinnaasut. Kiisalu aamma paasitinneqareerpugut, atuartut napparsimasut imaluunniit angerlarsimatiinnarneqartut, tamarmik ilinniagassinneqartartut atuagassaannillu tunineqarlutik, nammineerlutik angerlarsimaffimminniit malinnaasinnaaniassammata – qanoq ilillutu atuarfiit ingerlatsiviullu qulakkiissavaat, atuartut katataannginnissaat ´malinnaaffigiuminaassinissaallu´ taamatut atuartitsisoqassatillugu, taamaasillutillu soraarummeernissaminnut piareersimanngitsoorlutik?

Ilumoorpoq ilinniartitsisut angerlarsimaannartinneqartut (assersuutigalgu qanigisatut attaveqarfiit) sapinngisamik angerlarsimaffimminniit atuartitsisassammata. Atuarfiit aamma kaammattorneqareerput Zoom atorlugu atuartitsinertik nangittassagaat, taamaasillutik atuartut angerlarsimatiinnarneqartut malinnaasinnaaniassammata. Kisianni ajoraluartumik imaattoqartarpoq – naak angajoqqaat kaammattorneqaraluartut – atuartut ilaat qarasaasiakkut atuartitsnerni malinnaaneq ajormata. Qujanartumik maannakkut pisoq sivikinnerumaassaaq, atuarnermut tamakkiisumut naleqqiullugu, taamaattumillu malinnaaffigineqanngitsoortut atuartut soraarummeernissaannut apeqqutaasariaqanngillat, tassami misilitsinnissamut suliassat ukiumit atuarfiusumit kingullermit tamarmik atoqqitaanngimmata.