Inissiat, peqataatitsineq, piorsarsimassuserpullu immikkut eqqartuutaa borgmesteri Charlotte Ludvigsen ukiortaarsiorluarnissamik kissaassivoq, neriuutigaalu naleqartitagut, pingaartitagut inuiaqatigiinnilu assigiinngissutsigut nukittoqutigalugit ingerlaqatigiissinnaajumaartugut.
Innuttaasut tamarmik toqqissisimanissaat pingaaruteqarpoq. Nammineerluni ineqarneq toqqissisimanermik pilersitsisarpoq, ukiup qaangiutilersup ilarujussuani Kommuneqarfik Sermersuumi inissiat sammineqarsimapput. Kommuni tamakkerlugu sumiiffinni suli inissiassaaleqisoqarpoq, taamaattorli ukiuni tulliuttuni arfinilinni kommuni 1850-inik inissianik pilersitsinissamik pilersaaruteqarpoq.
”Nalunngilarpummi angerlarsimaffik taannaasoq pingaaruteqarnerpaaq, ulluinnarni inuuniarnermi ingerlalluassagaanni. Inuiaqatigiinni ajornartorsiuterpassuit aallaaveqartarput toqqissisimaffeqannginnermit, taamaattumik upperaarput inissaaleqineq akiorniarutsigu aamma inuiaqatigiinni ajornartorsiutigut allat ikilisinneqarsinnaasut”, borgmesteri Charlotte Ludvigsen oqarpoq.
2021-mi qinersisoqarpoq, kommunalbestyrelsi nutaaq ivertinneqarpoq, inuusuttuniit ukioqqortunerusunut, kitaaniit kangianut siammasissunik qinigaatitaqarluni.
”Taamaattumik uani anguniakkani ilaavoq innuttaasutsinnut peqataatitsinerulernermi, aammalu aqqutit assigiinngitsut atorlugit innuttaasunik periarfissiinermi politikkerit innuttaasullu ungasinnerat millisinneqarnissaa. Aamma pingaaruteqarpoq kommunitta iluani, Nuuk, Paamiut, Tasiilaq, Ittoqqortoormiut taakkulu nunaqarfii arfineq-pingasusuni, namminneq aamma inuunerminni aalajangigassartai eqqarsaatigalugit sullisinitsinni qanimut ingerlanerunissarput kissaatigineqarmat. Taamaattumik uani isumaqatigiissummi isumaqatigiippugut Nuummiit aalajangiisarneq kisimi peqqunagu. Taamaattumik ukiuni tullerni sulinissatsinni annertuumik taakku eqqumaffissaraagut. Pingaaruteqarpormi innuttaasut tamarmik naligiimmik periarfissaqartinneqarnissaat, aammalu sukkanerusumik sulianik naammassinnissinnaanissarput”, Charlotte Ludvigsen naqissusiivoq
Piorsarsimassuseq pingaaruteqarpoq
Piorsarsimassuseq inuiaqatigiinni pingaaruteqarnerpaanut ilaasutut borgmesterip eqqaavaa. Piorsarsimasutsikkut nukittoqutivut ilisimasariaqarpavut. Piorsarsimassuseq immikkuullarissuuvoq, pigiinnarnissaa pingaaruteqarpoq aammalu nunarsuarmioqatitsinnut takutinnissaa pingaaruteqarluni.
”Meeranerminngaannit ileqqut, naleqartitat pingaartitallu qanoq ilisimaarinissaat pingaaruteqartiginersoq. Tassa kinaassusermik taakkuupput napatitsisuusut, aammalu tulluusimaarutissaasut. Taamaattumik meeqqat atuarfianni kulturerput pillugu ilisimasaqarnerunissaq pingaartipparput, taamaattumillu ukiuni sisamani tulliuttuni sulinissatsinni aamma annertusaaffigineqarnissaanut ilaalluni. Nalunngilarput eqqumiitsuliortuuneq, nipilersortartuuneq assigisaallu ullumikkut inuussutissarsiutigineqarpoq, aammalu takornariaqarneq eqqarsaatigalugu nunarput immikkut ittumik immikkuullarissuseqarnera aamma takutinniarneqartariaqarpoq. ”
”Ukiumut qaangiuttumut qujanaq, aammalu qilanaarpunga, tamatta, illit isiginnaartutit, aanaakkugut, angajoqqaagut, qitornagut, sulisugut, sulisitsisugut tamatta peqatigiilluta ukiut tulliini ingerlaqatigiikkumaartugut. Naleqartitagut, pingaartitagut inuiaqatigiittut ineriartoqatigiinnissarput pingaartillugu ingerlaqatigiilluarisa.