Services

Ammassallup Katersugaasivia ukiuni marlunni matoqqareerluni ammaqqilerpoq

Ammassallup Katersugaasivia ukiuni marlunni matoqqareerluni kiisami Tasiilami innuttaasunut takornarianullu ammaqqinneqalerpoq, katersugaasiviullu ningiuata Jonna Klemensenip tamanna nuannaarutigaa.

”Katersugaasiviup ammaqqinnera illoqarfitsinnut isumaqaqaaq, tassami ukiut marluk sinnerlugit matoqqanikuuvoq. Innuttaasunut nuannaarutaassaqaaq, aamma takornarianik tikittoqarpat illoqarfimmi kulturimut tunngasunik misigisassarsiortoqarsinnaalissaaq”, taama oqarpoq katersugaasiviup ningiua Jonna Klemensen.

Tamatuma saniatigut ammaqqinnera inuit katersugaasivimmut attuumassuteqartut iluaqutigissagaat oqaatigaa. Ilaatigut pissutigalugu katersugaasivik atuarfimmit atorneqartarmat, taamaammat atuartunit pulaarneqarnissartik katersugaasivillu pillugu paasititsisarnissartik qilanaarput.

Saqqummersitat siornatigornit ikinnerulaaraluartut soqutiginartorpassuarnik takusassaqarpoq, soorlu kiinarpaat, ernisussiortup Sofie Jørgensenip atortui allarpassuillu.

Katersugaasivimmi ningiuusup katersugaasivimmi siunissami takorluugarpassuit erseqqissaatigilaarpaattaaq. Assersuutigalugu innuttaasut utoqqaat kristumiussutsip eqqunneqarnera sioqqullugu pissutsinik ilisimasallit oqaluttuaat katersussallugit pilersaaruteqartoqarpoq.

Katersugaasiviup ammasarfii aallaqqaammut imaassapput ataasinngornermiit sisamanngornermut kiisalu sapaatikkut nal. 13-16.