Kommunalbestyrelsip Tasiilami qatserisartoqarfik piffissamut naleqqutinngimmat nutaamik qatserisartoqarfittaarnissaa aalajangerpaa. Aningaasat nassaarineqareerput, ukiullu tulliani pilersaarusiornermik sulineq aallartissaaq.
Maannakkut Nuummi qatserisartoqarfik nutaaq sanaartorneqarpoq, maannalu Tasiilami piffissamut naleqquttumik qatserisartoqarfeqalernissaa kommunalbestyrelsip aalajangiuppaa.
Qatserisartoqarfik 1957-imeersuuvoq. Illu pillugu qatserisartunut qamutinik motoorilinnik halimiissinnaasunik inniminniinissaq unammillernarsimavoq. Qatserutit qamutit motorillit immikkut ittumik naleqqussarneqarsimasut, nalinginnaasumit naannerit, inniminnertariaqartarsimapput. Qatserisartoqarfik piffissamut naleqquttoq atulerpat immikkut ittumik naleqqussakkanik ujaasinissaq pisariaqarunnaassaaq.
”Isumannaallisaaneq pingaarnerpaavoq, taamaattumillu Tasiilami nutaamik qatserisarfeqalernissaa kommunalbestyrelsimit amerlanerussuteqartunit taperserneqarmat assut naammagisimaarpara. Innuttaasut toqqissisimanerulersinneqassapput kiisalu qatserisartut atugaat pitsaanerulissapput” borgmesteri Charlotte Ludvigsen oqarpoq.
Pilersaarutit malillugit suliaq ingerlanneqassappat qatserisartoqarfik nutaaq 2024-mi atulersinneqassaaq, tamannalu Tasiilami qatserisarput Hans Ib Kuitsep nuannaarutigaa.
”Uatsinnut tamanna assut pingaaruteqarpoq. Ullumikkut qatserisartoqarfipput nutaanngitsupilussuuvoq. Orniguttarnermut atatillugu atortugut assigiinngitsut inissaqarlualerpata innuttaasut ikiortariaqalersut iluaqutigissavaat, taanna oqarpoq.