Services

Nuummi juullip orpia uppitikkuminaatsoq

Ukiuunerani anorersuartartillugu Nuummi orpiliassat nappaqqatinniarlugit ajornartorsiutaakkajuttarpoq. Taamaammat juullip orpii anorersuartumi napalluarsinnaasunngorlugit atalluarsinnaasunik iluarsaattariaqarneq ajortunik peqarnissaq Nuummi Materialegårdenimiit isumagineqassapput.

Niels Motzfeldt Nuummi Materielgårdenimi ingerlatsinermut aqutsisuusoq juullip orpiinik atalluarsinnaasunik misileraanissamut suliniuteqartuuvoq.

”Danmarkimiit juullip orpiinik assigiinngitsunik pissarsisarnerput maanna ukiuni arlalinngortuni ingerlassimalereerparput. Kommuneqarfik Sermersuumi illoqarfinnut allanut nunaqarfinnullu juullip orpiinik anngussiniartarnerup ataqatigiissarneqarnissaa arlalitsigut ilungersunartutut isigisarparput. Orpiit ajoraluartumik nassiussuunneri akisuinnarneq ajorput iluarsaattarnerilu aamma akisusarput. Taamaattumik juullip orpianik nutaamik pilersitsivugut”, ingerlatsinermut aqutsisoq Niels Motzfeldt, oqarpoq.

Juullip orpianik illoqarfimmut allamut nassiussisarnermi unamminarsinnaasutut assersuutit ilagivaat Ittoqqortoormiinut nassiussisarneq. RAL-ip umiarsuaa kingulleq angumeriniaraanni orpiit nassiuttariaqartarput. Orpiit sivisulaamik uninngatinneqartussaapput, napparnissaannullu piffissanngoraangat meqqutaasai katagalereertarput. Tamatuma saniatigut tunumi sakkortuumik anorersuakkajuppoq, taamaammat juullip orpiinik atalluarsinnaasunik atuilernikkut aningaasanik sipaarfiullunilu illoqarfinni kusanartumik juullip orpianik peqartoqarsinnaavoq. Taamaaliortoqarneratiguttaaq juullip orpiinik uninngasuuteqartoqarsinnaavoq – ukiup aappassaanut piareersimatillugu.

Juullip orpia uppisikkuminaatsoq

”Ukiuunerani anorersuaraangat misilittakkavut naapertorlugit orpiit isikkorlulersinnaasarput. Taamaammat maannakkut juullip orpiinik atalluarsinnaasunik misiliivugut. Innaallagissamut atortukut igitat atorlugit suliarisarpavut, tassa wire-t savimernit atorlugit “orpilialiortarpugut” ilusilersorlugulu. Siaartartuutinneqarpoq, taamaalilluni sipaartoqarsinnaavoq atoqqitassaagami. Orpiup ulloriaa qulliillu LED-ussapput aaliangersarneqarlutillu anorimut tingissinnaajunnaarlugit”, Nielsi oqarpoq.

Juullip orpianik maanna misileraataasumik sanasoqarpoq. Qinngutsinni kaajallattariami siullermi ikkunneqassaaq. Tassunga ikkunniarneqarpoq misilittakkat naapertorlugit sakkortuumik tamanna anorersuartarami. Matumani juullip orpia iluatsittutut taaneqarsinnaalerpat Kommuneqarfik Sermersuumi illoqarfinni allani amerlanerusunik peqalernissaa anguniarneqassaaq.