Services

Innaallagissamik qamittoorneq: Kommuneqarfik Sermersuumiit ikiorserneqarnissamik pisariaqartitsivit?

Innaallagissamik pilersuinerup ajutooqattaarnerani kommunimi kiffartuussiviit arlalissuit artorsartinneqarput. Taamaattumik Kommuneqarfik Sermersooq suliassaqarfinni amerlasuuni ajornartoornermi upalungaarsimanermik atuutsitsilerpoq.

Ikuallattoornissaq upalungaarsimanerlu
Upalungaarsimasut nalinginnaasumik ingerlapput. Oqarasuaatit attaveerukkaangata qatserisartoqarfimmiit biilit pingasut illoqarfimmi angalaaqattaartualertassapput, taamaalillunilu innuttaasut biilinik unitsitsinermikkut qatserisartoqarfik attaveqarfigisinnaavaat.

Utoqqaat innarluutillillu
Piffissani innaallagissap ikumaffiini Nuummi angerlarsimaffinni ikiortit nalinginnaasumik ingerlasassapput, aammalu piffissani innaallagissap qamittoorfiini angerlarsimaffinni ikiortit ajornartoornermi upalungaarsimaneq tunngavigalugu sulisassapput.

Utoqqaat innarluutillillu tassanngaannartumik kiassarnermik imermillu amigaateqalersut Kommuneqarfik Sermersooq 321016-imut attaveqarfigisinnaavaat, taanna ulloq unnuarlu sianerfigineqarsinaavoq. Oqarasuaatit attaveerunnerini innuttaasut kommunip allaffiani innuttaasunik sullissivimmut ammarsarfiit nalinginnaasut nalaanni saaffiginnissinnaapput.

Inuusuttut ajornartorsiortut
Meeqqanut Ilaqutariinnullu Ingerlatsivimmi sulisut sisamat ulloq unnuarlu pigaartuupput. Oqarasuaatip normua nalinginnaasoq aqqutigalugu attaveqarfigineqarsinnaapput. Taanna ajorpat normut 321015, 555731 imaluunniit 529774 sianerfigineqarsinnaappat.

Oqarasuaatit attaveerunnerani Imaneq 20-mut ornigulluni saaffiginneqartoqarsinnaavoq.

Meeqqat paaqqinnittarnerlu
Atuarfiit ulluuneranilu paaqqinnittarfiit taamaallaat innaallagissap ikumanerini ammasassapput. Kisianni angajoqqaat inuiaqatigiinnut pisarialinnik suliaqarpata taakku tamarmik meeqqanik tigusisinnaapput. Taamaallaat ajornartoornermi neqeroorutip taassuma atorneqarnissaa inassutigaarput, innaallagiaq sivisuumik qaminngatillugu kiassarneq eqqiluisaarnerlu ajornakusoorsinnaammata.

Isumaginninnermi kiffartuussineq aamma innuttaasunik kiffartuussineq
Piffissani innaallagissap ikumaffiini Kommuneqarfik Sermersuup saaffiginnittarfii nalinginnaasumik ammasarput. Piffissani innaallagissap qaminngaffiini matoqqasarput.