Bormesteri Charlotte Ludvigsen Kommuneqarfik Sermersuumi innuttaasunik pingasunik nersornaasiinermini nersornaaserneqartut najuuttullu tuppalliutigerpasikkaat takuneqarsinnaavoq.
Ukioq manna ilungersuussilluartut borgmesterimit Charlotte Ludvigsenimit avammut suaarutigineqarmata inuit qulit missaaniittut najuupput. Ilungersuussilluartutut toqqarneqartut pingasuupput, maanna Kirsten Holm, Niels Nielsen kiisalu Krissie Berthelsen Winberg ilungersuussilluartutut imminnut taasinnaanngorput. Taakku tamarmik ukiorpassuarni nammineq kajumissusertik atorlugu sulisimapput.
Kirsten Holm, assigiinngitsorpassuarni nammineq kajumissuseq atorlugu sulisimanera pillugu nersorniarneqarpoq. Borgmesteri Charlotte Ludvigsen oqalugiaammini ilaatigut ima oqarpoq,
”Kirsteni assigiinngitsorpassuarni ikiuuttarpoq namminerlu piumassutsiminik sulisarluni ilaatigut Røde Korsimi. Kisiannili ilaatigut pingaartinneqarportaaq, Kirsten, suliniutit nappaassuarmut kræftimut eqqugaasimasunut ilaqutaanullu oqaloqatiginnittarnitit. Nammineerlutit kræftimik eqqugaanikuuvutit, nammineerlutillu unamminartut eqqarsaatillu aqqusaarnikuuatit, inuillu allat taamatut misigisaqarnerini inuunerminnilu aqqusaagassaanni ajornerpaami ikiortarlugit”, borgmesteri oqalugiaammini oqarpoq.
Niels Nielsen ukiuni 21-nit ikinnerunngitsuni nammineq kajumissutsini atorlugu Unnuarissani sulisimavoq.
”Unnuarissat unnuami inuunermut suliniuteqarluartuupput, meeqqanik inuusuttunillu unnuami naapitaminnik toqqissisimatitseqataallutillu ikiusarput. Unnuarissat immikkuullarissutigivaat inuusuttut pisariaqartitaat kisiisa aallaavigalugit suliniuteqartuugamik inuusuttullu namminneq ajornartorsiutit eqqartorusutaat pillugit oqaloqatigisarlugit. Niels, illit peqatigiiffivillu unnuami inuunermi inuusuttorpassuarnut, uatsinnullumi allannguinersi ersareqaaq, tamanna pingaartitaraat. Ilungersuussilluartuuvutit!”, borgmesteri oqarpoq.
Krissie Berthelsen Winberg nammineq kajumissutsini atorlugu NANUBØRN-imi sulisimanera pillugu nersornaaserneqarpoq.
”Meeqqat tamarmik pitsaasumik inuuneqarnissaminnut pisinnaatitaaffeqarput. Oqariartuutaavoq paasiuminartoq peqatigiiffimmi Nanubørnimi pinngortoq, ilungersuutigineqartorlu. Meeqqat, inuusuttut ilaqutaallu ajornartorsiutillit, kiisalu inuuniarnikkut atukkanik allannguinissamut periarfissaat. NANUBØRN 2008-mi Krissie Berthelsen Winbergimit pilersinneqarpoq, Nanubørn aamma Krissie sulinerminni Kalaallit Nunaat tamakkerlugu meeqqat arlalitsigut ikorfartorpaat, ilaatigut meeqqanut ornittakkanik pilersitsillutik. Ilaallu nuannaarutissiisartoq tassaavoq ilaqutariinnut meerartalinnut amerlasuunut ikorfartuutaasartoq, ukiumoortoq juullimut ikiorsiissut”, Charlotte Ludvigsen oqarpoq.
Aaqqissuussami kaffe, te, kaagit mamartullu allat sassaalliutigineqarpoq. Ivaana Olsen nipilersuusiaminik allallu nipilersuusiaanik guitarilisarluni akunniliillattaalluni tusarnaatitsivoq. Najuuttut aaqqissuussap ingerlanerani tuppallernartumik attortillattaanerat takuneqarsinaapput. Aaqqissuussami assit ataani takusinnaavaatit.
