Innuttaasunut

Tasiilami nipilersorneq, oqaatsit nutaaliornerlu qitiutillugit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nunafondenip aamma Tapiissuteqartarfik Sermiup tapiissuteqarnerisigut, Tasiilami inuusuttunut kulturikkut illutaami, Igdlo-mi eqqumiitsuliornikkut sapaatit akunnerini 46-mi 47-milu sammisassaqartitsisoqalerpoq.

Nanookikkut rockimik nipilersortartut, Frederik Elsner aamma Christian Elsner siuttoralugit kiisalu atuakkiortup, Niviaq Korneliussenip illoqarfimmi sapaatit akunnerisa ingerlanerini tikeraarnissaannut atatillugu sammisassaqartitsinissanut Atuakkiorfik Angalasoq suliniuteqartuuvoq.

Assilianik eqqumiitsuliortartoq, Gudrun Hasle aamma suliniummik aqutsisoq, Anette Molbech, Niviaq Korneliussen peqatigalugu Atuakkiorfik Angalasumi ingerlatsisuupput. Illoqarfimmi nipilersornikkut, nutaaliornikkut aamma oqaatsitigut allannermilu meeqqat inuusuttullu akornanni sammisaqartitsisoqassaaq.


Tasiilami inuusuttut Nanookikkunnik rockeqateqassapput
Nanook nipilersornermik ilinniarfik peqatigalugu workshoppertitsissaaq tusarnaartitsisoqassallunilu.

Tamatuma saniatigut, filmi nipilersortartumut tusaamasamut, Karl Sivertsenimut tunngasoq takutinneqassaaq. Filmillu suliarineqarnera pillugu inuusuttunut oqaluttuarineqassaaq, inuusuttullu isumassarsiorsinnaanissaat anguniarlugu atortut akisoorsuit piginngikkaluarlugit oqarasuaatit angallattakkat atorlugit qanoq filmeeraliorsinnaanersut aamma oqaluttuarineqassaaq.


Nersornaaserneqartoq Niviaq Korneliussen Naasuliardarpi-mit atuaassaaq inuusuttunillu suleqateqassalluni
Niviaq, Nunat avannarliit atuakkiortunut nersornaasiuttagaanik nersornaatiseqqammersoq, atuakkiaminit ”Naasuliardarpi”-mit ilaatigut Tasiilami pisimasumit atuaassaaq. Niviaq atuakkap saqqummerneranit siullerpaamik Tasiilamiissaaq – taannami nersornaammik ataqqineqarluartumik nersornaaserneqaqqammerpoq.

Katersortarfimmi Igdlomilu aaqqissuussanut marlunnut atatillugu inuusuttut inersimasullu atuakkiartoq naapissinnaassavaat.

Niviaq Kalaallit Nunaanni inuusuttut pillugit illersuisuuvoq, taamatullu oqariartuuteqartarnermigut inuusuttorpassuit akornanni tatigisaavoq. Aamma Niviamut malinnaasunut minnerunngitsumillu Atuakkiorfik Angalasup workshopertitsisarneranut malinnaasunut.

Tasiilami siullerpaamik 2018-imi aaqqissuussisoqarpoq. Tamatumalu malitsigisaanik radiukkut aallakaatitat arlariit suliarineqartut 2021-p aasaani aallakaatinneqarput. Aallakaatitallu taakkua KNR-ip podcastia aqqutigalugu naalaarneqarsinnaapput. Tamatuma kingorna Atuakkiortut atuarfianneersut inuusuttunut, Ilulissani 2019-imi Qaqortumilu 2021-imi workshopertitsipput.

Inuusuttut eqimattaaqqaneersut Niviap suleqatigissavai, podcastilu aqqutigalugu misiliissallutik. Tamanna pissaaq sapaatip akunnerani 47-mi, tassa ataasinngornermiit novembarip ulluisa 22-annit tallimanngorneq novembarip ulluisa 26-at ilanngullugu. Piffissami tassani Atuakkiorfik Angalasup aaqqissugaanik workshopertitsinermi inuusuttuaqqat Niviamit ilinniartinneqassapp


Assilianik eqqumiitsuliortoq Gudrun Hasle oqaatsit pillugit inuusuttunut sammisaqartitsissaaq
Sapaatit akunnerini 46/47-milu sisamanngornermi novembarip ulluisa 18-anit marlunngornermi novembarip 23-anut

assilianik eqqumiitsuliortartoq ukiullu arlerlugit Nuummiissimasoq, Gudrun Hasle Tasiilamiissaaq, taanna Atuakkiorfik Angalasumeersoq, Anette Molbech peqatigalugu oqaatsit assilianngortinnissaannut aaqqissuussami sammisaqartitsissaaq. Naatsumik oqaatigalugu ”oqaatsit allapalaaganngortinneqassapput”.

Tamanna Igdlomi pissaaq, taamaattumik inuusuttut kulturikkut illuata inuusuttunut, eqqumiitsuliortunut suliamullu peqataasunut matu ammarneqarpat sammisassaqartitsisoqangaatsiassaaq. Sammisaqartitsinissat Kommuneqarfik Sermersuumi, Tasiilami sunngiffimmilu kulturikkut immikkoortortaq suleqatigalugu aaqqissuussanullu atatillugu nipilersornermik atuarfik, timersortarfik katersortarfillu ilaatinneqarput. 

Aaqqissuussat Atuakkiorfik Angalasumit suliniutigineqarput, tapiissuteqarlutik NunaFonden aamma Tapiissuteqartarfik Sermeq.

Aaqqissuussanut peqataasussanullu paasissutissat uannga pissarsiarineqarsinnaapput:

Anette Molbech, suliniummut akisussaavoq – Den Rejsende Forfatterskole Grønland

(+45) 23231787 / anette@arcticaction.dk

Hjørdis Viberg, immikkoortortami pisortaq, Kommuneqarfik Sermersuumi sunngiffimmi kulturikkullu immikkoortortaqarfik, E-mail: hjvi@sermersooq.gl
Oqarasuaat toqqaannartoq: (+299) 367710
Mobil: (+299) 584264