Services

Tarnip pissusaanik immikkut ilisimasallit katsorsaasullu Tasiilami attaveqatigiittarfik pilersippaat

Meeqqanut sullissinermi angalaqatigiittartut holdiini sulisut Tasiilami attaveqatigiittarfittaamut immikkut ilisimasallit ataatsimoortippaat, innuttaasunullu ikiorsiinissamut ataatsimoorussillutik aaqqiissuteqarsinnaalissallutik.

Tasiilami attaveqatigiittarfittaami siullerpaamik ataatsimiittoqarmat, ilaatigut tarnip pissusaanik immikkut ilisimasallit katsorsaasullu qulingiluat peqataapput, taakkunani ilaapput, Meeqqanut Atuarfeqarnermullu immikkoortortami, psykoterapeuti, Andu Schiødt Olsen, kiisalu atuarfimmi tarnip pissusaanik immikkut ilisimasalik, Trudy Kreutzmann.

Andu S. Olsen psykoterapeutitut Tasiilami meeqqanut ilaqutariinnut sullissivimmi qaammatit arfineq pingasut sulisimavoq. Sulinermullu atatillugu suliffigisimasamini avitseqateqarsinnaasarsimannginnami tamanna oqitsuinnaasarsimanngilaq.

”Maani attaveqatigiiffittaartoqarneratigut tapersersuisoqalerneratigullu, uannut Tasiilamilu sulinitsinnut oqiliallaataassaqaaq. Tamanna innuttaasunut toqqissiallannassaaq nukinnillu tunisissalluni, innuttaasummi ilisimavaat sulinianut nalorninarsinnaasunut oqimaassinnaasunullu suliaqarsinnaasut amerlissammata”, Andu oqarpoq.

Taamatuttaaq Trudy Kreutzmann Tasiilami atuarfimmi tarnip pissusaanik immikkut ilisimasalittut ukiut arlariit sulisimavoq. Taanna isumaqarpoq, meeqqat ikiugassat pillugit attaveqatigiittarfittaaq nukissarpassuarnik tunisissasoq.

”Atuarfimmi sulilluni ajornanngippallaamik ilaanni annaasaqartutut misinnarsinnaasarpoq, meeqqat assigiinngisitaarluinnartunik ajornartorsiuteqartarmata. Pingaartumik suliassaqarfinnut tamanut immikkut ilisimaqarfiginagit. Taamaattumik attaveqatigiittarfik pingaaruteqarpoq. Tassanimi immikkut ilisimasallit oqaloqatigineqarsinnaapput, ikiuinissamummi periutsinik assigiinngitsunik misissuinermilu suleqatigiittoqarsinnaammat”, Trudy oqarpoq.

Tasiilami innuttaasunut suleqatigiinnerup nukittorsarnissaanut atatillugu tarnip pissusaanik immikkut ilisimasallit assigiinngiiaartut katsorsaasullu akuttunngitsumik ataatsimeeqatigiittassapput, imminnullu pisariaqartitatik naapertorlugit tapersersoqatigiittassallutik.