Services

Sunngorsinnaavunga? Nuummi Illorsuaq Timersortarfimmut ilinniagaqalernissamut nittarsaassinermut peqataajartorit

Ilinniagaqalernissamut periarfissat amerlapput, ilinnullu suna naleqqunnersoq nalornissutigigukku, taava novembarip ulluisa arfineq-aappaanni 2021 nal. 11-15 Nuummi Illorsuaq Timersortarfimmut ilinniagaqalernissamut nittarsaassinermut takkuteriaannaavutit. Tassani Majoriaq suliffeqarfinnik namminersortunik pisortaneersunillu arlalinnik aggersaavoq, taakkulu illit apeqqutigiumasatit oqaluttuaralugillu akissuteqarfigisassavaat.

Toqqagassarpassuaqaraanni ilinniagaqalernissamik suliffeqalernissamillu toqqaanissaq ajornakusoorsinnaasarpoq. Taamaattumik Majoriaq novembarip ulluisa arfineq-aappaanni 2021 Nuummi Illorsuaq Timersortarfimmi ilinniagaqalernissamut nittarsaassinermik aaqqissuussiniarpoq, illit paasisaqarfigisinnaasannik.

Suliffeqarfiit arlallit najuutissapput, minnerunngitsumik Kommuneqarfik Sermersooq, immikkoortortat assigiinngitsut nittarsaassinermi peqataatissallugit.

Iserneq akeqanngilaq, nittarsaassiviillu akornisiorlugit alakkarterisarsinnaavutit illit soqutigisannut tunngasunik apequteqartarsinnaallutit. Tassani paasiniaffigisinnaavatit suliffissat, ilinniagaqarfissat suliffimmilu sungiusarfissat.

Sulinerit suliffimmi sungiusarninni aallartereerniaruk

Kommuneqarfik Sermersooq 2300-nik sulisoqarpoq, taavalu Nuummi, Paamiuni Tasiilami Ittoqqortoormiinilu sungiusarfissanik neqerooruteqarsinnaalluni.

Taamaattumik suliffeqarfimmi nutaamik eqqarsarfiusumi sukkasuumillu ineriartorfiusumi, sulisunik innuttaasunillu qitiutitsiffiusumi peqataajumaguit, taava ornilullutit Kommuneqarfik Sermersuumi suliffissat suliffimmilu sungiusarfissat pillugit tusarniaajartorit.

Novembarip ulluisa arfineq-aappaanni ilinniagaqalernissamut nittarsaassinermi pisussat:

Nal 11:00:         Majoriaq Nuuk tikilluaqqusissaaq

Nal 11:05:         Borgmesteri Charlotte Ludvigsenip oqalugiarnera

Nal 11:10:         Qilaatersortoqarluni ammaanersiorneq

Nal 11:20:         Nittarsaassineq ammassaaq

Nal 15:00:         Nittarsaassineq tamaanga killeqassaaq