Services

Sermersuumi ineriartorneq, inuussutissarsiorneq sanaartornerlu pingaartinneqarpoq

Kommuneqarfik Sermersuumi kommunalbestyrelsip tamarmiusup oqaluttuarisaanermi aatsaat taama siammasitsigisumik missingersuutinut isumaqatigiissuteqarnermigut siunissamut ineriartortitsinissamut siunnerfeqarnissaq qulakkeerpaa.

Kommunalbestyrelsimi qinikkat tamarmik sanaartornermi, taamatullu inuussutissarsiutini allani kiffartuunneqarluarnermik, suliniutinik ineriartortikkuminartunik kommunillu inuussutissarsiutinik ingerlataqartutsinnut pikorissunut annertuumik pingaartitsineranik misigititsinissaq pingaartilluinnarpaat. Siammasissumik missingersuusiornermut isumaqatigiissummi patajaassuserpiaq suliffeqarfinnut pingaaruteqarpoq. Kommunimi inuussutissarsiornermut periusissiap nutaap ingerlanerani akuutitsinermi tamanna suliffeqarfiit amerlanerpaat tikkuarpaat, tamannalu maanna qulakkeerneqarpoq.

 Aamma ineqarneq nunaminertallu pitsaasumik ineriartorfiupput, aammalu Iserit-ip kommunimi sumiiffinni tamani inissiaatinik amerlisaanini ingerlatiinnassavaa suliniutinilu annertusissallugit. Taamatuttaaq nunaminertat inuussutissarsiornermut atorneqartussat nutaat pitsaanerusullu kommunalbestyrelsimit pingaartinneqarput, tamanna inuussutissarsiutinik ineriartortitsinermi qitiulluinnartoq nassuerutigineqarmat. Siorarsiorfimmut sulluliassap salliutinneqarneratigut Nuummi suliffeqarfinnut nunaminertanik nutaanik sanaartorfissagissaanissamut agguaanissamullu periarfissiisoqassaaq, kiisalu inissianut 1.700-t sinnerlugit amerlassusilinnut inissaqartitsisoqalissalluni.

Missingersuutinut isumaqatigiissummi kisitsisit oqariartuutaat ersarippoq. Sanaartornermut missingersuutini aaliangerpugut 300 mill. missaat atorneqassasut. Uani eqqaasinnaavagut Utoqqaat Angerlarsimaffianik nutaamik pilersitsinissaq aammalu Ittoqqortoormiuni inissiat nutarterneqarnissaannut pilersaarusiortoqarnissaq. Paamiuni sanaartugassanut assersuutigalugu oqaatigisinnaavarput illoqarfimmik kivitsisussanut nutaanut 30 millionit sinnerlugit immikkoortinneqarput, tassanilu soorunami ukiuni tullerni suliffissanik kaaviiaartitassanillu pilersitsisoqassaaq. Tasiilamut aqquserniornerinnarmut kuuffilersuinerinnarmullu 18 millionit immikkoortinneqarput, aammalu umiarsualiveqarnermut attuumassutillit pitsanngorsaavigineqassallutik. Nuummi Siorarsiorfimmut sulluliassaq atuutilissaaq 2027-mi. Ilisimavarput Nuummi innuttaasunit amerlasuunit Nuussuarmi sulluliap pioreersup allineqarnissaa qilanaarisorujussuugaat, ullumikkut angallannikkut pissusiusut pitsanngortinneqartariaqarmata. Nutarterinissaq pisariaqartoq kommunalbestyrelsimit nassuerutigineqarpoq, taamaattumillu Nuummi angallannermut pilersaarummut nutaamut 12,5 millionit immikkoortinneqarput, kiisalu Nuussuarmi sulluliap allineqarnerata 2029-mi naammassinissaa naatsorsuutigineqarpoq.

Nuummi aqqusineqarfiit, illoqarfissuarmut naleqquttut nutaaliat pigineqassapput. Angallannermut pilersaarummi aqqusernit kaajallarissat qullernik aqutsissutilinnut allanngortinneqarnissaat, aammalu angallannerup mingutsitsinngitsumik ingerlaavartumillu ingerlasinnaalernissaat siunnerfigineqarpoq. Tamanna angallaffiunerpaasumi arriillisarnermik annikillititsissaaq, tamatumalu peqatigisaanik pisuinnaat isumannaannerulernissaat qulakkeerneqassalluni.

Taakku, kiisalu suliniutissarpassuit allat ataatsimoorluni aalajangiiffigineqarput, tassanilu kommunip ukiuni tulliuttuni ineriartortitsinermi aningaasaqarnera pitsaasoq ingerlannarnissaa anguniarlugu siunnerfiit takutinneqarput. Tamanna isumaqarluartumik atugarissaarnissamut, toqqissisimanissamut, suliffeqarnissamut ineqarnissamullu qulakkeeriniarluni aqqutissat pitsaanersaraat.

Kommunimi inuussutissarsiornermut siunnersuisoqatigiit, inuussutissarsiornermi ataqatigiit aamma immikkoortortaqarfik Sermersooq Business aqqutigalugit, aamma siunissami Sermersuup inuussutissarsiortunut inussiarnersuuneranik, kommunitullu ineriartortitsiviusutut eqqummaarissutullu Kalaallit Nunaani, taamatullu Imarpiup avannaa tamakkerlugu inissisimaneranik qulakkeeriniarluni kommunalbestyrelsip inuussutissarsiortunut qanittumik attaveqarnini qulakkiissavaa.

Charlotte Ludvigsen

Borgmesteri, Kommuneqarfik Sermersooq.