Services

Nunatsinni illoqarfiit sisamat Imarsuup tikeraassavai

Karen Thastum eqqumiitsuliortut TURA YA MOYA, qulliit seqertittakkat atorlugit takutitassiaq Imarsuaq Nunatsinni angalaarluni isiginnaagassiaraa. Tikeraarneqartut tamarmik takutitassiamut ilanngussaqartarput, taannalu tikiffissamut tullianut nassarneqartarluni.

Eqqumiitsuliortut TURA YA MOYA nunani tamalaani seqersittakkat qulliillu atorlugit suliaqartarnermikkut ilisimaneqarput, taakkulu massakkut takutitassiarivaat Imarsuaq. Eqqumiitsuliortut taakku sinnerlugit Karen Thastumip Tasiilaq, Nuuk, Qeqertarsuatsiaat aamma Paamiut tikeraarsimavai.

Kulturimut isumassarsiorfik ilapittuutaavoq

Kulturimut isumassarsiorfik Qeqertarsuatsiaanut ilaavoq, tassani atuarfimmi workshop ingerlanneqarpoq qulequtaralugu ”Imarsuaq”.

Atuartut tamarmik peqataatinneqarput, meeqqallu pingaarutilinnik apeqqutissaqarput soorlu:

“Qangarsuaq angalasoqartarsimanera ullumikkut inuunermut qanoq sunniuteqarpa?”

Qanoq ililluta immami inuussutissat pingaarutillit nerisareqatigiit kingulissatsinnut  attatiinnassavagut?

Meeqqat eqqarsaatersuutaat eqqumiitsuliaallu qulliit atorlugit seqersittakkamut ilanngupput, taakkulu qaqqanut illunullu qanittumiittunut seqersinneqarlutik.

Imarsuaq allanngorartuarpoq

IMARSUAQ/HAVETS VEJE angalanermi sumiiffiit tikinneqartut apeqqutaallutik ineriartortinneqarpoq tikinneqartuni eqqumiitsuliortunit, meeqqanit inuusuttunillu ilaartorneqarluni, tamakkulu tikitassap tullissaanut nassarneqartarlutik.

Suliniummut Nordisk Kulturkontakt, NAPA, NunaFonden DJBFA, Statens Kunstfond kiisalu suliffeqarfik Stark tapiipput, soorunami aamma Kulturimut isumassarsiorfik.