Services

Atuarfinni tuniluunneq ima pinaveersaartissavarput

Nuummi coronamik tuniluuttoqarpoq, meeqqat atuarfii eqqugaangaatsiarput. Taamaammat Kommuneqarfik Sermersooq iliuuserisassanik assigiinngitsunik pilersitsivoq, iliuutsit atuarfinni tuniluunnerit pinaveersaartissavaat. Atuariartorfissat nikisinneqarput, atuartitsinerit tamarmik klassikkaalerput kiisalu anitsiarfiit allanngorlutik.

Sapaatit akunneri kingullerni Nuummi tuniluuttoqangaatsiarpoq, meeqqat atuarfiini atuartut tuniluuttoqarnerani immikkut eqqugaapput, taamaammallu tuniluunneq ingalassimaartinniarlugu Kommuneqarfik Sermersooq iliuusissanik assigiinngitsunik pilersitsivoq.

”Meeqqat atuarfii Coronamik tuniluunnermi eqqugaangaatsiarput. Taamaammat iliuuserisassatsinnik assiginngitsunik pilersitsivugut, taakkulu Nuummi meeqqat atuarfiini tuniluunneq pinaveersaartissavaat”, Meeqqanut Atuarfeqarnermullu ingerlatsivimmi pisortaq Lone Nukaaraq Møller oqarpoq.

Iliuutsit pingasut ukuupput;

  • Angajulliit atuariartorfissaat pisinnaatillugu nikisinneqarnerat
  • Taamaallaat klassikkaartumik atuartitsinerit – aamma eqaarsaarnermi
  • Atuartut silamiitillutik taamaallaat klassetrineqatitik ilagisinnaavaat, atuarfiullu iluani taamaallaat klasseqatitik ilagisinnaallugit


Qanoq iliortoqarneranik ASK-imiit assersuut

8.-10 klassit Zoomikkut/Teamsikkut akunnerit siullerni, 08:00-miit 09:30-p tungaanut atuartinneqassapput.
Ilinniartitsisut atuarfimmiissapput klasselokaliniit atuartitsissapput, tassani atuartut tikeraat ipads-eqanngitsut peqatigalugit atuartitsillutik.
Atuartut 09:50 atuariartussapput ullullu sinnerani nalinginnaasumik atuartinneqassallutik.
Atuartut atuartut allat naapeqqusaanngilaat.
Immikkut atuartitsinerit klassini ingerlanneqassapput, immikkut ilinniartitsisut klassi aalajangersimasoq ilinniartitsisuuffigissavaat. Taamaaliornikkut atuartut imminnut naapinnissaat pinaveersaartinneqassaaq.

Tamakku saniatigut anitsiarfiit ullup qeqqasiornerillu allanngortinneqarput, taamaaliornikkut atuartut naapinnginnissaat anguneqassammat, aamma atuaqatigiit atuarfimmi immikkut isertarfeqarlutillu anisarfeqassapput.