Tasiilami meeqqat inuusuttullu weekendip ingerlanerani qilanaarutissaqaqaat. Sapaatip akunnerata naaneranimi pisassaqartitsisoqartussaammat, soorlu taparneq, isiginnaagassat assigiingitsut, kaagiliornermi unammineq Igdlo-milu eqqissisimaarujoorneq. Tallimanngornermi arfininngornermilu Fritidsklubbimi meeqqat inuusuttullu unnuiartorsinnaassapput. Aaqqissuussat tamarmik akeqanngillat!
Aaqqissuussat tallimanngorneq aallartissapput Inuusuttut Kulturikkut Illuani, Igdlomi, taanna nal ataatsimiit unnuap qeqqata tungaanut eqqissisimaarfigerujoorneqarsinnaassammat. Fritidsklubbi unnukkut arfineq-pingasuniit unnuap qeqqata tungaanut aammassaaq, unnuap qeqqaniilu meeqqat inuusuttullu eqqissisimasunik avatangiiseqarniarlutik unnuiartorsinnaassallutik. Klubbi ullaakkut qulit tungaanut ammassaaq. Unnuiartortunullu nerisassaqassalluni.
Inuusuttut aamma unnukkut qulit qeqqaniit marlut tungaanut Katersortarfimmi nukitik tamaasa atorlugit unnuaq tamaat tapariarsinnaassapput.
Isiginnaarneq aamma kaagiliorneq
Arfininngorneq eqqissisimanerussaaq Katersortarfimmi assigiingitsunik isiginnaagassaqassammat. Katillugit isiginnaagassat sisamat assigiingitsut takutinneqassapput. Siulliit marluk meeqqanuussapput, unnukkullu quliniit inuusuttunut takutitsisoqassalluni. Assit ataaniittut takukkit.
Igdlo ullaakkut quliniit unnuap qeqqata tungaanut ammassaaq. Ualikkut tallimaniit 14-niit qummut ukiulinnut kaagiliornermik unammisitsisoqarnissaanut lagkagebundiliorneq aallartissaaq. Arfineq-marluk qeqqaniit eqimattakkaarluni unammisitsineq aallartissaaq, ajugaasut pinnatassaqassapput! Uani paasisaqarfiginerusinnaavat.
Fritidsklubbi unnukkut arfineq-marluniit aammassaaq, unnuap qeqqaniillu unnuerusuttut aggikaasinnaassallutit aqaguani ullaakkut qulit tungaanut isersimasinnaassallutik.
Weekendimi susassaqanngikkussi meeqqat inuusuttullu allat eqqissisimaaqatigalugit nuannisaqatigerujoorsinnaavasi – unnukkullu sinilluarsinnaassallusi ullup ingerlanerani nuannisarnikooriarlusi. Aaqqissuussat tamarmik akeqanngillat!
